ISUA HI JEHOVA A NI

Thuthlung Hluia Pathian pakhat chauh kha Isua Jehova hi a ni tih tilang fiah turin Pathian lehkhathu sawm leh pahnih kan han tarlang dawn a  ni.

1.   Isaia 40:3 thu chuan Thlalera mi au rawl chuan, “LALPA (Jehova) lamlian sial ula” ati a, he hrilhlawkna thu hi Baptistu Johana khan a rawn tidik ta a ni tih Matthaia 3:3 thu hian a sawi a ni. Johana hian LALPA Isua Krista tan kawng chu a buatsaihsak tih kan hria. Hetah hianh LALPA (Jehova)  hi Isua sawi nan hian a hmang a ni. Jehova hi Pathian pakhat hming zahawm tak anih avangin Israelte Mi thianghlim tan chauh lo chuan mi dang sawi nan Bible hian a hmang ngailo.

2.   Malakia 3:1 thu chuan, “In zawn LALPA (Jehova) chu a Biak Inah alo kal phut ang; Ngaiteh u, Thuthlung Tirhkoh in lawm em em chu alo kal e” tiin a sawi a. Kuta sak Biak In emaw  taksa Biak In emaw a sawi anih pawhin he thu hi Isuan a rawn tifamkim ta hrim hrim a ni.

3.   Jeremia 23:5-6 thu hian Davida atanga zar alo chhuah tur a sawi a-hei hi Messia (Isua) sawina a ni ngei mai a – A hming chu “LALPA chu kan felna (Jehova Tsidkenu)” tih a ni. Kawng dang kan sawi chuan “LALPA (JEHOVA) CHU KAN FELNA” tih hi “Isua chu kan felna” tihna  a ni.

4.   Isaia’n Jehova chanchin sawiin, “Ama ban ngei chuan Chhandamna chu  a insiam a” (Isaia 59:16); “A ban chuan a aiah ro a rel ang” tiin (Isaia 40:10). Isaia 53:1-2 thu chuan Messia (Isua) ngei hi LALPA (Jehova) ban lo lang chu a ni tih a sawi a. Tichuan Isua hi Pathian dang nilovin Khawvel chhandamna tura Jehova mihring tisa taksa chu  a ni.

5.   Isaia chuan, “LALPA (Jehova) ropuina chu tihlan a ni ang a, mi zawng zawngin chu chu an hmu tlang dial ang” ati a (Isaia 40:4). Jehova chuan ropuina chu tu hnenah mah a pek loh tur thu a sawi bawk a (Isaia 42:8; 48:11). Chuti anih chuan he hrilhlawkna hi amah ngei ain tihlan chauhvin a thleng dik thei tihna a ni. Pa ropuina chu Isuan a nei tih Thuthlung Tharah kan hria a (Johana 1:14; 17:5). Ropuina Lalpa a ni (I Korinth 2:8). Isua chu alo kal leh hunah pawh Pa ropuinaa inthuamin alo kal dawn a ni (Matthaia 16:27; Marka 8:38). Tichuan Jehova ropuina chu Isua ropuina a ni a, chuvangin Isua hi Jehova chu a ni.

6.   Jehovan heti hian a sawi a, “Chuvangin ka mite chuan ka hming an la hria ang; chuvangin chumi niah chuan a sawitu chu ka ni tih an hri ang; ngaiteh u, Keimah hi ka ni” tiin (Isaia 52:6). Isua hi Pa chanchin sawitu a ni a, Pa hming tilangtu a ni a, Pa hming hriattirtu a ni bawk a (Johana 1:8; 17:6; 17:26). Isuan LALPA (Jehova) hming chu a tilang a (Sam 22:22; Hebrai 2:12). Chutichuan Isua hi Jehova ngei a ni.

7.   LALPA (Jehova) chuan, “Khup tinreng chu ka hmaah an thingthi tawh ang a, Lei tinreng pawhin ka hnenah chhechhamin thu an tiam tawh ang” ati a(Isaia 45:23). Hemi thu hi la chhuakin Paula’n mi zawng zawng Krista rorelna hmaa ding tur an nih thu a sawi a (Rom 14:10-11). Paula vekin, “Mitin Isua hmaah an thingthi dawn a ni” ati bawk a(Philippi 2:10).

8.   Zakaria hian Isua Krista chu Jehova a ni tih finfiahna tha tak mai a sawi a. Zakaria 11:12-13 thuah chuan heti hian kan hmu a, “Tin, an hnenah chuan, tha in tih chuan ka hlawh chu min pe ula, intih loh chuan minm pe suh u, ka ti a; chutichuan ka hlawh atan cheng sawmthum an buk chhuak ta a. Tin, LALPA (Jehova) chuan ka hnenah, ka man atana tha awm tawk an chhiar chu bel vawtu hnenah pe mai rawh, ati a. Tin, cheng sawmthum chu ka la a, LALPA (Jehova) inah chuan, belvawtu hnenah chuan ka pe ta mai a ni” tiin.

                

 Zakaria 12:10 thuah chuan Jehova’n heti hian a sawi bawk a, “Tin, an chhuna chu min la rawn en ang” tiin. Isua hi cheng sawmthumna an hralha chu a ni a, an chhuna chu a ni bawk a (Matthaia 26:14-16; Johana 19:34).

               

 Zakaria 12:10 thuah chuan, “Davida chhungte chu Pathian ang an lo ni ang a” tih kan hmu bawk a, hei hi Messiah tlawhchhanin a sawi a ni. Zakaria 14:3-5 thuah chuan, “Tin, LALPA (Jehova) ka Pathian chu alo kal anga, A mi thianghlim zawng zawngte pawh I rualin an lo kal ang” tiin hnamte a do tur thu Olive tlanga a ke a rawn nghah tur thu kan hmu a, Isua hi a rawn kal leh hunah chuan Olive tlangah a ke a rawn nghat dawn a ni tih kan hria a, Lalte Lal ang leh hotute Hotu angin hnamte chu a rawn do bawk dawn a ni (Tirhkohte 1:9-12; I Timothea 6:14-16; Thupuan 19:11-16).

9.   Paula, Juda lehkhathiam, Pharisai chungchuang, Kristiante tiduhdahtu kha Damaska khaw kalkawngah mitdel khawpa engin Pathianin a chhun thlu a, “Lalpa tunge I nih ?” tiin a zawt a. Juda a nih avangin Lalpa Pathian pakhat chauh a awm tih a hresa vek a, “Jehovah tunge I nih ?” tiin a au chhuak ta a, Lalpa (Jehova) chuan, “..Isua ka ni”” tiin a rawn chhang a nih kha.

10. Mosia khan Pathian Jehova chu a be thin ngei tak a, Hebrai 11:26 thu chuan Aigupta ram hauhsakna ro zawng zawng aiin Krista an hmuhsitna chu Mosia chuan hausakna ropui zawkah a ngai a ni tih thu  a sawi , Mosia Pathian chu Isua Krista hi alo ni daih tawh tihna a ni.

11.  Sam 68:18 thu chuan Jehova chu chunglama a chhoh thu leh a mante chu sala a hruai thu a sawi a, chutih lai chuan chunglama han chhova, a mante chu sala hruaitu chu Isua a ni tih kan hria. Eph 4:7-10 thu hian Isua chanchin hrilhlawkna a ni tih a tilang si a.

               

 Isua hi Pathian Jehova chu a ni ngei a ni tih sawina Pathian thu dang tam tak alo awm cheu bawk a. A hnuaiah hian, Bible chnag inkawp Jehova sawifiahna leh Isua sawifiahna ni bawk kan ziak tlar dawn a ni. Heng Pathian thute hian Isua hi Jehova a nih ngeizia a tilang fiah a ni.

Table : ISUA HI JEHOVA A NI (1)

☞        Jehova chu Engkimtithei a ni,------Genesis 17:1

                Isua pawh Engkimtithei a ni.-------Thupuan 1:8

☞        Jehova chu AWMA a ni a.--------- Exodus 3:14-16

                Isua pawh AWMA  ani. ------------Johana 8:24,58

☞        Jehova chu LUNGPUI a ni a.------- Sam 18:2; 28:1

                Isua pawh LUNGPUI a ni. ---------- I Korinth 10:4

☞        Jehova chu Chhandamna Ki a ni a.----Sam 18:2

                Isua pawh Chhandamna Ki a ni. -------Luka 1:69

☞        Jehova chu Beram Vengtu a ni a.-------Sam 23:1; Isaia 40:10-11

                Isua pawh Beram Vengtu tha;

                Beram Vengtu Ropui, Beram Ventu Lalber a ni. – Hebrai 13;20; I Petera 5:4

☞        Jehova chu Rouina Lal a ni a, ------- Sam 24:7-10

                Isua pawh Ropuina Lal a ni.----------I Korinth 2:8

☞        Jehova chu Eng a ni a. ---------------- Sam 27:1; Isaia 60:19

                Isua pawh Eng a ni. ------------------- Johana 1:4-9, 8:12; Thupuan 21:23

☞        Jehova chu Chhandamna a ni a. ------ Sam 27:1; Isaia 60:19

                Isua pawh Chhandamna awmchhun a ni. --- Tirhkohte 4:10-12

☞        Jehova chu lalpate Lalpa a ni a. ----- Sam 136:3

                Isua pawh lalpate Lalpa a ni bawk.--- Thupuan 19:16

☞        Jehova chu Mi Thianghlim a ni a. ----- Isaia 12:6

                Isua pawh Mi Thianghlim a ni. -------- Tirhkohte 2:27

☞        Jehova chu Dan min petu a ni a ------ Isaia 33:22

                Isua pawh Thuthlung Thar min petu a ni. --- Hebrai 9:14-17

☞        Jehova chu Roreltu a ni a. ------- Isaia 33:22

                Isua pawh Roreltu a ni. -------  Mika 5:1; Tirhkohte 10:42

☞        Jehova chu Hmasabera leh Hnuhnungbera a ni a. ----- Isaia 41:4; 44:6, 48:12

                Isua pawh Alpha leh Omega, a Bul leh a tawp

                Hmasabera leh Hnuhnungbera a ni. ------------ Thupuan 1:8, 22:13

☞        Jehova chu Chhandamtu awmchhun a ni a, --- Isaia 43:11, 45:21, 60:16

                Isua pawh Chhandamtu a ni. -------------- Tita 2:13, 3:6

☞        Jehova chu Thlarau lam intur petu a ni a, ------- isaia 44:3, 55:1

                Isua pawh Tuinung lui petu a ni. --------- Johana 4:10-14, 7:38-39

☞        Jehova chu Israel Lal a ni a, ------ Isaia 44:6

                Isua pawh Israel Lal, lalte Lal a ni. ---- Johana 1:49; Thupuan 19:16

☞        Jehova chu Engkim Siamtu awmchhun a ni a. --- Isaia 44:24, 45:8, 48:13

                Isua pawh Engkim Siamtu a ni. ------------ Johana 1:3; Kolossa 1:16

☞        Jehova chu Pathian fel awmchhun a ni a. ---- Isaia 45:21

                Isua pawh mifel a ni. ------ Tirhkohte 7:52

☞        Jehova chu Tlantu a ni a, ------- Isaia 54:5, 60:16

                Isua pawh Tlantu a ni. ---------- Galatia 3:13; Thupuan 5:9

Table 2 : ISUA HI JEHOVA A NI (II)

☞        Jehova-Jire (Petu)

                Isua chu Petu (Inthawina) a ni. -------- Hebrai 10:10-12

☞        Jehova-Rapha (Tidamtu)

                Isua chu Tidamtu a ni. -------------------- Jakoba 5:14-15

☞        Jehova – Nissi (Hnehna)

                Isua chu Hnehtu a ni. ----------------- I Korinth 15:57

☞        Jehova-M’Kaddesh (Tithianghlimtu)

                Isua chu Tithianghlimtu a ni. ---------- Ephesi 5:26

☞        Jehova-Shalom (Remna)

                Isua chu Remna a ni. ------------- Johana 14:27

☞        Jehova-Sabaoth (Sipaihote Lalpa)

                Isua chu Sipaihote Lalpa a ni. ---------- Jakoba 5:4-7

☞        Jehova-Elyon (Chungnungber)

                Isua chu Chungnungber a ni.----------- Luka 1:32,76,78

☞        Jehova-Raah (Beram Vengtu)

                Isua chu Beram Vengtu a ni. ---------- Johana 10:11

☞        Jehova-Hoseenu(Siamtu)

                Isua chu Siamtu a ni. ------------ Johana 1:3

☞        Jehova-Tsikenu (Felna)

                Isua chu Felna a ni. ----------- I Korinth 1:30

☞        Jehova-Shammath (Awm)

                Isua chu a Awm reng a ni. ------ Matthaia 28:20

                Kan han tarlan takte khi thil chuangtlai a ni lova, Isua hi Jehova a ni ngei tih tilang chiang lehzualtu an ni. Jehova chu pakhat chauh a awm si a (Deutoronomy 6:4), hemi awmzia chu Thuthlung Hluia Pathian pakhat chauh awm thin a kha Lal Isua hi a ni tih kan hre thei a ni.  

                                                                                                                         - Source *The Oneness of God by David K. Bernard

LALTHUTTHLENGA THU CHU ISUA CHAUH HI A NI

Vanah Lalthutthleng pakhat chauh a awm a, chutah chuan mi pakhat a thu a. Thupuan 4:2 ah chuan Johana’n heti hian a sawi a: “Tin, chawplehchilhin thlarauvin ka lo awm ta ngal a; tin, ngaiteh, Vanah Lalthutphah alo inhung a, chumi thutphahah chuan mi pakhat alo thu bawk a” tiin. Lalthutthlenga thu hi hnial rual lohvin Pathian a ni tih a chiang a, a chhan chu Lalthutthleng hual vela awm thil nung palite chuan heti hian a sawi a:

               

                 “Lalpa Pathian, Engkimtitheia,

                Awmtawha leh Awmmeka leh Lolaawmtura chu,

                A thianghlim e, a thianghlim e, a thianghlim e”   Tiin (Thupuan 4:8)

Hemi thu hi Thupuan 1:5-18 thu nen kan khaikhin chuan, Isua nihna a sawifiahna leh Lalthutthlenga mi thu sawifiahna hi a inang tih kan hre thei a ni.

                 

                “Kei Alpha leh Omega ka ni”

                Lalpa Pathian, Awmmeka leh Awmtawha leh Lolaawmtura,

                Engkimtitheia chuan ati a ni” (Thupuan 1:8).

Chang 5-7 thu hian chang 8-na thu hi Isua ngei a ni tih a tichiang a. Tin, Chang 11-18 thu chu Isua chanchin vek a ni bawk. Chang 11-na thuah hian Isua chuan “Alpha leh Omega,A Hmasaber leh a Hnuhnungber” a ni tih a tilang leh a. heng 17-18 thuah hian Isuan heti hian a sawi bawk a:

               

 “Kei Hmasabera leh Hnuhnungbera leh

  Minung chu ka ni, ka lo thi a,

Nimahsela ngaiteh, kumkhua atan ka lo nung leh ta a ni, Amen Thihna leh Mitthi lhaw chabite ka nei bawk a” tiin

Thupuan bung hmasaber atang hian Isua nihna kan hmu a: Lalpa Engkimtitheia, Awmtawha, awmmeka, Lolaawmtura tihte hi. Isua chungchanga nihna leh thu hmante hi Lalthutthlenga thu chungchang sawinan hian a ni leh vek a, Tichuan Lalthutthlenga thu hi tumah dang nilovin Isua Krista ngei hi a ni tih a lang a ni.

A khaikhawmna han sawi belh leh ila, Thupuan 4:11 thua Lalthutthlenga mi chu Engkimsiamtu a ni a, Isua chu Engkimsiamtu a ni tih kan hre bawk a (Johana 1:3; Kolossa 1:16). Chubakah Lalthutthlenga mi thu chu Ropuinate, Chawimawinate, Thiltihtheihnate hmu tlak a ni a (Thupuan 5:12). Thupuan 20:11-12 thua Lalthutthlenga mi thu chu Roreltu (judge) anih thu min hrilh a, Isua chu mi zawng zawng tan roreltu a ni tih kan hria (Johana 5:22,27; Rom 2:16, 14:10-11). Tichuan Thupuan bung 4 thua Lalthutthlenga mi thu hi Isua ngei a ni tih kan hre thei a ni.

Thupuan 22:3-4 thu hian Pathian leh Beram No Lalthutthleng chanchin a sawi a. Heng thute hian Lalthutthleng pakhat, hmel pakhat leh hming pakhat a sawi a ni. Tichuan Pathian leh Beramno chu mi pakhat, hmel pakhat leh hming pakhat nei Lalthutthlenga thu chu a ni. Pathian nisi Beramno ni bawk si chu Isua Krista chauh hi a ni (Daniela Bung 7, Thupuan Bung 5 leh bung 9 chhiar bawk la, nakinah a hrilhfiahnate ka rawn post leh dawn nia). A tawi zawnga kan sawi chuan, Vana kan kal hunah chauh Lalthutthlenga thu kan hmu dawn tih Thupuan Bu hian min hrilh a ni. Vanrama Pathian kan hmuh theih tur awmchhun chu Isua hi a ni.

PATHIANIN ‘KAN’ TIH TAWNGKAM A HMAN CHUNGCHANG:

      Gen. 1:26-27 ah Pathianin mihring a siam dawn khan “Kan anpuiin, keimahni ang takin mihring siam ila” tih tawngkam a hmang tlat mai a, pakhat aia tam sawina ‘Kan’ (plural) tih a hman tlat avangin Pathian pakhata minung pathumte chu inbe rawna, “Kan anpuiin……… mihring siam ila,” tita niah ngaih a awl hle mai a. Mahse, Genesis 1:27-ah a mihring siam chu, “Ama anpuiiin ngeiin a siam a ni,” tih kan hmu a. Ama anpuia a siam, Adama chu minung pakhat, taksa pakhat nei a nih miau avangin Pathian chu pakhat ngei a ni tih a tichiang a. Pathian pakhata minung pathum awmin, chung mite pathum chu thil tih theih dan intluktlang, inbe rawn ni tak tak se, a anpui chiaha a siam Adama (mihring) hi minung pathum a ni ang a, mahni hi kan inbe rawn tluar tluar ngei ang !! Pathianin ama anpui chiaha a siam mihring chu minung pakhat chiah a nih avangin Pathian pawh pakhat a ni tih a chiang hle a ni.

         

 Tin, ‘kan’ (we) tih (plural form) a hman avang hian Pathian kha pakhat aia tam (mi nung pathum) a ni tihna a ni kher chuang lo. Kan bula awmte a zirin mihring pawhin ‘Kan’ tih tawngkam hi hman tul chang a tam mai, “Delhi-ah kan zin a,” ka tih avangin mi nung pathum ka ni chuang lova, ka bula kal vete chhal telin ‘kan’ tih kha ka hmang mai zawk a ni. Inkhawmna leh puipunnaah ka tawngtai dawn a, “Ilo tawngtai ang u” ka tih chuan ‘ang u’ tih hi mi pakhat aia tam sawina anih rualin mahni chauvin ka tawngtai ta si a, mi nung pathum ka ni tihna a ni chuang lo. ‘Ang u’ tih ka hman khan ka bula awmte sawi telin (plural form) pakhat aia tam sawina ka hmang mai thin ang hian, kan Pathian pawhin mihring a siam dawn hian a bula awm vantirhkoh ho, a rawngbawl saktute hriattir vein – “Kan anpuiin mihring siam ila’ ati mai zawk a ni. A siamtu tak tak chu amah Pathian kha anih avangin, “Ama anpui ngeiin a siam a ni,” tiin mi pakhat (singular) anihzia a tarlang leh mai a ni. Pathianin ‘kan’ tih tawngkam a hman ve avangin buai tur a ni chuang lo.

               

 Isaia 6:8-9 thuah Lalpa awin, “Tunge ka tirh ang a, tunge ka tan kal ang?” a tih thu zawlnei Isaia’n a hre tlat mai, “Tunge kan tan kal ang?” Pathianin a tih miau si chuan Pathian pakhatah minung pathum a awm ang a, an inbe rawn ang a, an aiawha tirh tur dapin, “Tunge kan tan kal ang” ati mai turah ngaih a awl hle a. He Bible chang mal ngawt thlir hi chuan ngaih sual palh theih tak a ni ve leh a. Isaia 6:2 atangin chhiar ta ila “A kiangah (Pathian kiangah) chuan Serafte an ding a, thla paruk an nei theuh va, an thla pahnihin an hmai an khuh a, pahnihin an ke pahnihte an khuh a, pahnihin an thlawk a, tin, ‘Sipaihote Lalpa chu a thianghlim e,’ tiin an inau tawn an inau tawn a,” tih kan hmu a. A sawi zelnaah, “Chutichuan seraf pakhat maicham ata chaicheha cheh meiling kengin ka hnenah alo thlawk a, ka han dep a,” tiin a sawi zel bawk a.  

                

 Zawlnei Isaia hmuh angin Pathian hi amah chauhvin a awm ngai lova, a kiangah vantirhkoh an awm ve ziah thin a. Pathian hnam thlan Juda-te’n Pathian an tih lungnih loh avangin zilhna pe tur palai hna thawk turin mihring ngei (zawlnei) tirh a duh si a. (Mi hausa Lazara chungchang tehkhinnaah pawh, “Mosia leh zawlneite an nei alawm, chu mite thu chu ngai rawh se,” (Luka 16:29) tiin palaiah mihring a rin tlat zel kha). Van mite aiawha palai kal tur a zawn avangin – “Tunge ka tirh ang a, tunge kan tan kal ang?” tih angai tlat a. Pathian pakhata mi nung pathum awm ang a ngaih tur a ni lo. Tirh tumtu Pathian chu pakhat anih avangin, “Tunge ka tirh ang a,” ati a. Van mite aiawha a tirh dawn avangin, “Tunge kan tan kal ang” ati ta a, tawngkam diktak a ni zawk a ni.

                 

Nehemia 2:17 thuah Nehemia’n Jerusalem kulh tung ding leh sa tha tura a belh lai khan, “Hawh u, sawi chhiat kan nih tawh lohnan Jerusalem kulh chu I din leh ang u,” tiin a au va. ‘Hawh u’ tih leh ‘I din leh ang u’ tih tawngkam hmang siin amah chauhvin a au si a. Nehemia kha mi nung pathum (Trinity) niin a inberawn ta em ni?? Ti ta ila, zawhna atthlak a ni ngei ang. A bula awm Juda-te Jerusalem kulh sa tha turin a sawm mai a ni zawk. Chuvangin Pathianin , “Hawh u, kan anpuiin mihring siam ila,” atihte, zawlnei Isaia’n, “Tunge ka tirh anga, tunge kan tan kal ang,” tia Pathian aw a hriatte, Nehemia’n, “Hawh u, Jerusalem kulh chu I din leh ang u,” a tihte hi an bula awmte vanga mi pakhat aia tam sawina tawngkam hmang mai an ni a, mi nung pathum (trinity) anga ngaih chi a ni reng reng lo a ni. 

                                                                                                                           - source Oneness Theology by Pastor R. Sangthanga