THUTHLUNG THAR HRILHFIAHNA (PART 1) PATHIAN KUT DINGLAM

PATHIAN KUT DINGLAM

                Thuthlung Thar buahte hian Pathian kut ding lama Isua a thut thu sawina a tam hle a. Petera’n Sam 110:1 ami kha Tirhkohte 2:34 thuah hian a sawi chhuak a.

                Tirhkohte 7:55 thua kan hmuh angin Stephana lunga an denhlum mek laiin Van lam a hawi chhova, “Pathian ropuina a hmu a, Pathian kut dinglama Isua ding a hmu a”. Hei hi enge a awmzia ni ang le? Vanah khian Pathian pahnih, Pathian leh Isua chu a hrang ve ve in taksa neiin a han hmu tihna em ni ang? Tin, Isua chu Pathian kut dinglamah englai pawhin a ding reng dawn em ni ang? Isua bakah Isua nilo Pathian hmuin, Pathian pahnih a han hmu tihna em ni ang le?

                Mihring taksa ban dinglam nen inang tura “Pathian dinglam” hrilhfiah hi a diklo a ni. A diklohna chhan pakhatah chuan, tuman engtiklaimahin Pathian an hmu ngai lo tih tlat a ni a, mihringin amah chu a hmu thei lo a ni (Johana 1:18; I Timothea 6:16; I Johana 4:12), Pathian chu Thlarau anih avangin hmuh theih a ni lo (I Timothea 1:17). Mihring pianhmang anga a duh huna a inlantir tumah chauh lo chuan taksa ban a nei lo. Stephan hian Isua bak Pathian dang a hmuh belh lo tih kan hria. Pathian pahnih hmu ta se engah nge an pahnih hnenah chuan a tawngtai loh tehlul ang? Isua hnenah chauh a tawngtai tlat a ni (Tirhkohte 7:59-60). Pa leh Isua hi a hrangin han hmu ni ta se, Pathian inthen hrang ngai lo awmkhawm a hmu anih chuan, mi nung pathumna Thlarau Thianghlim pawh engah nge a hmuh telloh tehlul ang?

                Tirhkohte 7:55 thu hi ngun taka kan zir chuan Stephana hian Isua bak Pathian dang a hmu hauh lo tih kan hria ang. Chang 55-na thu hian “Pathian ropuina zam velah” Isua a hmu a, Pathian Thlarau a hmuh thu a sawi si lo. Chang 55-na thu-ah vek chuan, “Ngaiteh u, Vante inhawng ka hmu a, Pathian dinglama mihring Fapa ding ka hmu” tiin Stephana hian a sawi mai a ni. Ruangam neiin emaw mihring hmel angin emaw Stephana hmuh chhun chu Isua Krista chauh a ni.

                “Pathian dinglam” tih hi taksa ban tak tak anga kan ngaih dawn chuan thil buaithlak tak dang a piang leh pek a! Tirhkohte 2:34 a ziak ang hian Isua chu Pathian dinglamah a thu reng si a; a nih loh vek leh Tirhkohte 7:55,56 thu ang chuan Isua chu Pathian dinglamah a ding reng mai ve thung bawk dawn em ni ang? Chumi zawhah chuan Isua chu Pathian kut dinglam sirah a thu leh em ni ang? Pa angchhungah Isua chu a awm bawk em ni ang? (Johana 1:18). Chutiang chu lo ni ta se Thupuan 4:2 thu hi engtin nge kan sawifiah ve thung ang? Vana Lalthutthleng pakhata mi pakhat thu chu tunge ni ta ang le? Lalthutthleng pakhatah chuan Pa chu a thu ang a, chumi sirah chuan Isua chu a thu ve em ni ang? Lalthutthleng pakhat chauh awmah chuan Isua chu a thu chiang hle bawk si a ni lawm ni? (Thupuan 4:2, 8, 1:8, 18).

                “Pathian dinglama” Isua awm tih chu entirna emaw ruangam emaw a ni ngei ang. Bible hmun hrang hrangah hian Pathian dinglam tih sawin atamtak a awm a, chungte nen chuan a thuhmun thei ang.

                Davida chuan Sam 16:8 thuah chuan heti hian a sawi a:

                “Lalpa chu ka hmaah ka awmtir fova,

                Ka dinglama a awm avangin

                Ka nghing lovang” tiin.

               

                Davida dinglamah hian taksa neiin Pathian chu a awm tihna em ni ang? Sam 77:10 thu chuan heti hian a sawi a:

                “Chungnungbera kut dinglam kumte kha ka hrechiang ang e” tiin. Sam ziaktu hian Pathianin kut dinglam a neih kumte hriatreng a tiam tihna a ni kher em? Sam 98:1 thu chuan ti hian a puang leh bawk a:

                “Lalpa chawimawiin hla thar sa rawh u,

                A kut dinglam leh a ban thianghlimah chuan

                Amah atan chhandamna a siamsak ta a” tiin.

                He thu awmzia hi, a hmelmate hneh nan Pathian chuan a kut veilam chu a dah thain, a kut dinglam hmangin a hmelmate a hneh tihna a ni kher em? Sam 109:31 thu chuan Lalpa chu “Pa chhe dinglamah a ding ang a, A nunna rorelsaktute laka chhandam turin” a ti a. Mi retheite dinglamah chuan taksa neiin Lalpa chu a ding reng dawn tihna a ni ang em? Isaia 48:13 ah chuan LALPA chuan “Ka kut hian lei nghahchhan chu a phum a, ka kut dinglam hian Vante chu a kai pharh a”, a ti a. Isaia 62:8 ah chuan LALPA chuan a kut dinglam chhalin chhia a chham bawk a. Pathian chuan a kut dinglam sei tak chu pharchhuakin, Van khi a kut chuan a khuh em ni ang, tin, a kut veilam chu a kut dinglam chungah a dah ang a, tichuan chhia a chham ta em ni ang? Pathian kutzungtang hmangin Isuan ramhuai a hnawt chhuak a (LUka 11:20). Van atangin kutzungtang liantak a han ban thla ang a, mihring kawchhunga ramhuai lak chhuah nan a hmang ta em ni ang le?

                Heng zawhna zawng zawng chhanna hi “Ni love” tih hi a ni. Tichuan “Pathian kut dinglam” tih chu, ruangam emaw entirna emaw, anih loh pawhin hla thu anga zeldin thu mawi tak a ni thin a, mihring taksa ban anga ngaih tur a ni lo. Chuti anih leh Pathian dinglam chu engtihna nge ni ber ang?

                Bible tu-ah hian dinglam tih chu, Chaknate, thiltihtheihnate, pawimawhnate, duhsaknate, hnehnate, thiamchantirnate, thu kalhmang pangngaia chungnunna sawina a ni thina ang hi a ni a “Hemi hi ka kut dinglam a nih hi” tih angte leh “Hemi tan hian ka ban dinglam ka phar ang” tih ang chite hi an ni. Trinity ringtu zinga mi thiam Bernard Ramm chuan heti hian a sawi a, “Ban dinglam tih hi Pathian engkimtitheia a nihna sawina atna hman a ni thin a,a chhan chu mihringte hian ‘ban dinglam’ hi chakna leh thhiltihtheihna entirnan kan hman thin vang a ni. L:angsar ber nihna sawinan “Pathian kut dinglama thu” tih hi hman a ni thin a, a chhan chu mihringte awmkhawmnaah leh nunhonaah hian kan mi langsar ber leh duhsak ber chuan kut dinglam hmun a chang thin a ni” tiin a sawi a. [24]

                Kut dinglam hi thiltihtheihna sawina atan Bible hian a hmang thin a, chung zinga thenkhatte chu a ngaihnawmin a tangkai thei bawk awm e. Exodus 15:6 thuah chuan:

                “I kut dinglam chu aw LALPA,

                Thiltihtheihnain a ropui a,

                I kut dinglam chuan aw LALPA

                Hmelma chu I ti sawm dep a” tiin.

               

                Sam 98:1 thu leh Sam 110:1 thute hi hmelmate chunga Pathian kut dinglamin hnehna a channa thute an ni bawk a. Isua chu Pathian kut dinglamah a thu tih Bible-in a sawi hian, Isuan Pathian thiltihtheihna leh thuneihna zawng zawng chang vek a ni tih a tilang a ni.. He thu hi Matthaia 26:64 thuah hian Isuan a sawi chiang hle niin a lang a, “Tun hnuah mihring Fapa hi Thitihtheihna dinglama thu a Van chhum chunga a lokal in la hmu ang”tiin. Marka 14:62 leh Luka 22:69 thute en tel bawk la. Tichuan Isua hi Pathian thiltihtheihna zawng zawng nei vekin a inchhala, heng zawng zawng hi a neih vek avang hian Isua chu Pathian a ni tih a inpuang chiang hle a ni. Pathiana a inchhal chianzia hi Judate chuan an hre chiang hle a, heng avang chiah hian puithiam lalten Pathian a sawi chhia tiin Isua chu an hek ta a ni (Matthaia 26:65). Thuthlunhg Hlui huna Pathian kut dinglam tih thin kha puithiam lalte hian an hrethiam niin a lang tlat a ni. I Petera 3:22 thu hian “Kut dinglam” tih chuan Isuan thiltihtheihna zawng zawng leh thuneihna zawng zawng a nei vek tih nan a hmang bawk a, “Isua Krista chu vanah kalin Pathian kut dinglamah a awm a; Vantirhkohte, thuneihnate, thiltihtheihnate, rorelnate, hmingsak tinrengte chunga lalna a neihzia a sawi bawk a. Hemi thu hian kut dinglam tanchhanna hmangin  Krista chungnunna thu a sawi a ni. Hemi thu ang chi bawk hian Tirhkohte 5:31 thu chuan heti hian a sawi leh bawk a, “Amah ngei kha Pathianin Lalah leh Chhandamtua awm atan a dinglamah a chawimawi ta a, Israelte sim tir tur leh ngaidam turin” tiin. (Sam 110:1 leh Tirhkohte 2:33-34)

                Tirhkohte 5:31 thu hian Pathian kut dinglam emaw Pathian ban emaw chu chhandamna tura Pathian thiltihtheihhna sawinan hman a ni fo tih a ti lang a. Ama mite chhanchhuahna hna a thawhna a hnehna thu sawi nan Pathian lehkhathu hian “Pathian kut dinglam” tih tawngkam hi a hmang tam hle bawk a ni (Exodus 15:6; Sam 44:3; Sam 98:1). Isaia 59:16 thu chuan, “A ban chuan chhandamna a rawn thlen a” a ti a. Tichuan, Pathian dinglama Isua awm thu hrilhfiahna pakhat chu “Isua hi Pathian chhandamna thiltihtheihna puanchhuahna a ni” tihna ang a ni. Pathian dinglama Isua awm thu leh Isuan palai hna a thawh thu hi thu inmil thlap a ni a, a bik takin puithiam lal anihna ang a kan chanchin min sawisaktu a nihna hna nen pawh a inmil zel a ni (Rom 8:34; Hebrai 8:1).

                “Pathian kut dinglam” yoh chu lpo hrethiam ta phawt ni ila, engvangin nge Isua chu Pathian kut dinglamah “a thut” kher? (Hebrai 10:12 thu angin). Engatinge Pathian kut dinglamah a awm Rom 8:34 thu ami angin a tih ve mai loh le? Isua chuan hun engemaw bikah, ropuina leh thiltihtheihna leh thuneihnate chu a kimin a dawng tihna bik pawh a ni mahna le. He dinhmun sang tak hi mitthi zing ata alo thawhleh atang khan a luah tan a, Vana a lawn hnuah khan he dinhmun hi a luah fel ta a ni. Khatih hunlaiah khan mihringte phak chin leh taksa nei anga tih theih chin neihna lak atangin Amah leh amah a intih zalen tak a vang pawh a ni thei ang. Hei hi Philippi 2:6-8 thua mihringa a lo chana Isua a rawn intihtlawmna nen khan a thlak ve thung a ni. Lei chungah mihringte anga ke a kal thin a nihnaa hna a thawh zawh hnuah Pathian dinglamah a thu thei chauh a ni.

                Mihring chak lo leh derthawng tak dinhmunah Lal Isua chu a intulut tawh lova. Tunah chuan tihduhdah tuar chhiahhlawh a ni tawh hek lo. A ropuinate, a zahawmnate, Pathian a nihnazia dangte pawh tunah chuan thuhrukin a awm tawh hek lo. Tunah chuan tih ropui taksa neiin Pathian a nihna anga a thiltihtheihnate a hmang tawh zawk a ni. Mitin tan Lalpa leh roreltu diktak a nihna ang leh lei pumpuia Lalber a nihna angin thil a ti tawh zawk a, a ti leh zel bawk ang. Chuvang chuan Isua Krista chu leia mihring pangngai anga a awm ang khan  Stephana hian a hmu lova, Pathian ropui leh Pathian thiltihtheihna neiin a hmu ta zawk reng a ni. Chutiang bawk chuan Johana pawh khan Isua chu thiltihtheihna leh a ropuina zawng zawnga inthuamin a han hmu ta a ni (Thupuan 1). He chawimawina leh ropuina leh Krista khuh hawnna hi Vana a lawn hnuah chauh khan a infuankhawm ta a ni. Marka 16:19 thu chuan “Lal Isua chu, an hnena thu a sawi zawh chuan Vana hruai chhohin a awm a, Pathian dinglamah a han thu ta a”, tiin ziak a ni.

                Krista chuan tlanna hna a thawh chu a chhunzawm zel tawh loh avangin  leh a thawh zawh tawh avangin Pathian dinglamah “a thu” ta a ni. “Thu” tih hian Chawlhsan a kawk a ni. “Sualte a tlenfai hnuin chhunglama Ropuibera dunglamah khian a han thu a” tih a ni (Hebrai 1:3). “Tin, Puithiam tinreng kawla ni chhuak chhiara rawngbawlin, sualte engtikahmah tibo thei lo inthawina vawikhat chauh a hlan hnuin, Pathian dinglamah a han thu ta zawk a, chuta chin chu a hmelmate a kephah nghahchhana siam an nih hma loh zawng  a nghak reng a” tih a ni bawk a (Hebrai 10:11-13).

                A khaikhawmnan chuan, Pathian kut dinglama Isua awm hi, Pathian, taksa pawh nei hrang, pahnih inkara awm anga kan hrilhfiah dawn chuan thu inmil thei lo kan hmu teuh dawn a ni. Amaherawhchu Pathian thiltihtheihnate, chaknate, thuneihnate, chungnunnate, Isua mihringa a lo chang avanga chhandamnaa a thiltihtheihnate sawina ang a kan hriatthiama kan pawm theih chuan thu inkalhte chu a bo duak mai ve thung a. Chubakah hetianga hrilhfiahna hi Bible hmun danga “Pathian kut dinglam” tih nen a inmil thlap vek zawk a ni. “Kut dinglam” tih chuan Isua Pathian famkim a nihzia leh Engkimtithei a nihzia a tilang fiah a, Pathian pakhat a nihzia Kristaah a tilang a ni.

                A tira kan zawhna siam, Stephana khan engti chiahin nge a hmuh? Tih lamah khan han let leh ta lawk ila. Isua a hmu a ni. Isaia 40:5 thu chuan Messia lo kal hun tur sawi lawkin “LALPA ropuina chu tihlan a ni ang a, mi zawng zawngin chu chu an hmu tlang dial ang” a ti a. Isua chu Pathian ropuina tihlanna chu a ni a, Stephanan Isua a hmuh khan Pathian ropuina chu a hmu a ni. Pathian ropuina Isuaa  engchhuak ta chu a hmu a, Pathian thuneihna leh thiltihtheihna zawng zawng neiin a hmu ta a ni. A tawi zawngin, tih ropui Krista chu a hmu a ni. Lal Isua chu mihring ang chauhin a hmu lova, thuneihna leh thiltihtheihna leh ropuina zawng zawng neiin Pathian a nihna ngei chu a hmu bawk a ni. Chuvang chuan Pathian chu a ko ta a, “Lalpa Isu, ka thlarau la ang che” tiin. Tirhkohte 7:59.