THUTHLUNG HLUIA PATHIAN KHA ISUA HI A NI

Thuthlung hlui khan Isua hi Pathian a ni tih a rawn puang

1.   Isua hi Pathian kan tih chu a ni tih hriatfiah theihna chiang tak pakhat chu Isaia 9:6 thu hi a ni a: “Kan tan naupang alo piang a, fapa pekin kan awm ta a, rorelna chu a kokiah a chuang ang a, a hmingah chuan Maka, Remruattua, Pathian Chaka, Chatuan Pa, Remna Lal an la ti dawn si a”. Naute lo piang hi “Pathian Chaka” leh “Chatuan Pa” mihring a lo chang chu a ni tih a chiang hle.

2.  Isaia hian Messia chu Immanuela sak tur ani tih a sawi lawk a, Immanuela chu kan hnena Pathian awm tihna a ni si a. (Isaia 7:14; Matthaia 1:22-23).

3.   Isaia chuan Messia chu Davida pa Jesaia atanga lo chawrchhuak anih thu leh Jessaia chu Messia atanga lo chawrchhuak anih bawk thu a sawi a (Isaia 11:1, 10). Tin, Isua chuan Davida lo chawrchhuahna zung leh Davida thlah anih tho thu a sawi leh bawk a (Thupuan 22:16). Mihring tisa a nihna kawngah chuan Jessaia leh Davida thlah atanga lo piang a ni a, chutihlai chuan Thlarau anihna lamah ve thung chuan Jesaia leh Davidate siamtu, an nunna zung a ni leh tho bawk a. Hemi thil nihdan hi rilrua hre ran chungin Pharisaite tih manganna turin Sam 110:1 thu hi Isuan a sawichhuak a. “Davida chuan Lalpa tiin Messia chu a ko si a, engtinnge Messia chu Davida fapa anih theih le?” tiin a zawt buai duh ve kher a ni (Matthaia 22:41-46).

4.  Isaia 35:4-6 thu hian Isua chu Pathian a ni tih a tilang leh bawk a: “Ngaiteh tu…. In Pathian chu alo kal ang a, a chhandam ang che u” tiin. Pathian alo kal hunah chuan mitdelte mit alo var ang a, bengngawngte beng pawh tih varin a awm ang a, kebaite pawh an zuang ang a, tawngtheilote lei pawh alo tawng bawk ang tih thu a sawi chhunzawm bawk a. He Pathian lehkhathu hi Amah insawi nan Isuan a hmang a (Luka 7:22), a rawngbawlnaah khan heng thil hi a ti vek reng a ni.

5.  Isaia 40:3 thu chuan, “Thlalerah LALPA kawng buatsaih ula, ram rovah chuan kan Pathian tan lamlian ti rual rawh u”. Baptistu Johana khan Isua tan kawng a sial sak a, heng hrilhlawknate hi a ti famkim ta a ni (Matthaia 3:3). Tichuan, Isua hi LALPA (Jehova) kan Pathian chu a ni.

6.   Mika 5:2 thu chuan Messia (Isua) hi Pathian a ni tih a tifiah leh bawk a. “Nimahsela, nang Bethlehem Ephratha, Judai rama sang tam tak zinga telah te hle mah la, nangma lak atang hian Israelho roreltu tur chu kan tan alo chhuak ang a; a lo chhuahna chu hmakhawsang ata, chatuan atangin a ni.” Tiin.

Tichuan Thuthlung Hlui hian Messia leh Chhandamtu lokal tur chu Amah Pathian ngei a ni tih chiang takin a sawi a ni.

THUTHLUNG THAR HIAN ISUA HI PATHIAN A NI TIH A PUANG BAWK A.

1.  Tirhkohte 20:28 thu hian Kohhran chu Pathianin a thisenin a lei a ni tih min hrilh a, chu Pathian thisen chu Isua thisen hi a ni.

2.  Paula chuan Isua chu “Kan Pathian ropui tak Chhandamtu Isua Krista” tiin a sawifiah a (Tita 2:3). New International Version (NIV Bible) chuan “Kan Pathian leh Chhandamtu ropui tak, Isua Krista” tiin a sawi bawk a ni.

3.   Petera chuan “Isua Krista kan Pathian leh Chhandamtu” tiin a sawifiah a (II Petera 1:1). NIV leh TAB (Amplified Bible) chuan “Kan Pathian leh Chhandamtu Isua Krista” tiin a sawi bawk a.

4.   Kan taksa hi Pathian Biak In (Inkhawmna Biak In ang hi) a ni a (I Korinth 3:16-17), Krista ngei chu kan thinlung chhunga cheng (leh kan taksa chhunga cheng) a ni tih kan hre bawk a (Ephesi 3:17; II Korinth 13:5).

5.  Kolossa bu hian Krista Pathianna chu khauh takin a sawi uar hle a ni. “Amahah (Kristaah) chuan Pathian famkimna tinreng chu taksa neiin a awm reng si a” a ti a ni (Kolossa 2:9; 1:19). He Pathian thu chang hian Isua chu Pathian a ni ve tawk tawk angin a sawi lova, Pathian Pathianna zawng zawng chu Amahah hian a kim vek a ni a ti zawk a ni. Pathian Pathianna chu mihrang an awm an tih thin chu lo dik ta ang sela chuan, Kolossa 2:9 thu hian chung mi hrang hrangte chu taksa neiin Isuaah hian a awm kim vek a ni tih a sawi ngei tur a ni ang. Amahah chuan kan famkim ta bawk a (Kolossa 2:10). Pathian hnena mamawh kan neih apiangte chu Isua hnenah hian a kimin kan hmu vek a ni (Kolossa 2:9).

PATHIAN CHU MIHRING ISUA-AH ALO CHANG

Isua hi Pathian a ni tih thu hian a sawi ber chu Pathian chuan mihring tisa a rawn pu tih hi  a ni. Hei tak hi Bible-in a sawi chu a ni.

1.   Pathian chu tisa puin alo lang a, (Tisaa lo lang a)

Thlarauva thiam chang a,

Vantirhkohte hmuha,

Jentailte zinga tlangaupuia,

Khawvelah hian mite rina,

Ropuinaa hruai chhoh taka chu.” (I Timothea 3:16). (Chang 16 thu nemnghettu chu chang 15 thu hi a ni tih ennawn leh la). Pathian chu hmuh theih turin tisaah alo chang ta a; Pathian chu thlarauvah hriatfiah alo ni ta bawk a; Pathian chu Vantirhkohte’n an hmu tawh bawk a, Pathian chu khawvelah mite’n an lo ring ta bawk a, Pathian chu ropuinaa lakchhoh a ni leh tawh bawk a nih chu- Engtin leh engtikah nge heng thil hi alo awm? Lalpa Isua Kristaah khan a thleng kim vek tawh.

2. “A tirin thu a awm, thu chu Pathian hnenah a awm, Thu chu Pathian a ni- Thu chu tisaah alo chang ta” (Johana 1:1-14). A tak takin thu (Pathian) chu Tabernacle ah (Biak Inah) tisain alo chang ta. Engtik lai khan nge Pathian chuan tisa kawr a rawn hak? Isua Kristaah khan a famkim vek tawh bawk. Heng Bible thute hian Isua chu Pathian a ni tih a sawifiah hle mai. Pathian chu tisain a inpuanga, a inhriattir, a inhriatfiahtir, a inpholang, a inentir takmeuh a ni.

Pathian chu Thlarau  anih kha. Thlarau chauh anih lai khan tisa leh thisen anei lova, mihring hmuhtheih a ni hek lo. Mihringte hmuhtheih anihna turin leh kan sual tamtak thisen thianghlima chhuahtir theihnan tisa a rawn put a tul a ni. Isua hi Pathian dang a ni lova, Pathian peng pawh a ni lova, Thuthlung Hluia Pathian tisaa inthuam a ni zawk. Pa a ni a, mihring sualna a vangin chutianga alo awm chu a tul miau si a ni. Mihringin kawr chung a ha thin ang deuh hian Pathianin tisa a rawn ha a ni. Pathian lehkhathu chang tamtak hian Isua Krista hi Thuthlung Hlui Pathian ngei kha a ni tih a puang a, amah a inpuang chianna tur leh lei leh van inrem lehna turin tisa kawrfual a rawn ha mai a ni. (Kawrfual kan hakin kawrchung chhungah kan awm thin ang hian, Isua tisa taksa vun chhungah Thlarau Pathian chu alo awm a ni).

3. “Khatia Pathianin Kristaah chuan Khawvel hi amah nen inremin a siam a- inremna thu min kawltur kha” (II Korinth 5:19).

4. “Tuman englai mahin Pathian an hmu ngai lo, a Fapa mal neih, Pa angchhunga awm ngei khan a chanchin a hril tawh a ni” (Johana 1:18)

5. “Pathian, Hmakhawsanga thlahtute hnena bung tam tak leh kawng tinrenga zawlneitea thu sawitu khan, heng ni tawpah hian keimahni hnenah a Fapa chuan thu a sawi ta. Chumi chu engkim rochungtuah a ruat a, chumi pawh chuan Khawvelte chu a siam a, Ani chu a ropuina eng leh a tak anpui ngei leh ama thiltihtheihna thua engkim tungdingtu niin, sualte a tlenfai hnuin chunglama Ropuibera dinglamah khian a han thu a” (Hebrai 1:1-3).

6. “Isua chu hmuhtheihloh Pathian anpui (Image) a ni a” (II Korinth 4:4; Kolossa 1:15).

7. Isua chu Puanin taksa a khuh ang a, tisaa inkhuh Pathian a ni (Hebrai 10:20). Ama thusawi hrethiam vek lovin Abrahama pawh hian, “Pathian beram no chu intumchawp ang chu” a ti anih kha (Genesis 22:8). Pathian chuan inthawina tur taksa chu a intumchawp ta ngei reng a: “Inthawina leh thil hlan I duh lova, ka tan taksa min buatsaih zawk a ni.” A ti a nih kha (Hebrai 10:5)

8. Isua chu chhungkaw dintu a ni a (Pa Pathian leh Engkim siamtu a ni a). A chhungkaw dinah chuan Amah chu Fapaah a rawn insiam bawk a (Hebrai 3:3-6).

9. Ama thisiamte hnen ngeiah chuan alo kal a, Ami tlan chhuahte hnenah ngei chuan, nimahsela an lo hre lova, an lo lawm bawk hek lo (Johana 1:10-11)

Pathian chu Thlarau  anih kha. Thlarau chauh anih lai khan tisa leh thisen anei lova, mihring hmuhtheih a ni hek lo. Mihringte hmuhtheih anihna turin leh kan sual tamtak thisen thianghlima chhuahtir theihnan tisa a rawn put a tul a ni. Isua hi Pathian dang a ni lova, Pathian peng pawh a ni lova, Thuthlung Hluia Pathian tisaa inthuam a ni zawk. Pa a ni a, mihring sualna a vangin chutianga alo awm chu a tul miau si a ni. Mihringin kawr chung a ha thin ang deuh hian Pathianin tisa a rawn ha a ni. Pathian lehkhathu chang tamtak hian Isua Krista hi Thuthlung Hlui Pathian ngei kha a ni tih a puang a, amah a inpuang chianna tur leh lei leh van inrem lehna turin tisa kawrfual a rawn ha mai a ni. (Kawrfual kan hakin kawrchung chhungah kan awm thin ang hian, Isua tisa taksa vun chhungah Thlarau Pathian chu alo awm a ni).

3.      

)

MIHRING NUN A HMAN TIRH ATANG KHAN ISUA CHU PATHIAN A NI NGHAL

Pathian chu Isua Kristaah tisain alo lang a, a nun eng hunah tak khan nge Fapaah chuan Pathian alo chen tan? Bible chuan chiang tawk takin Isuan mihring nun a hman tan ve leh Pathian famkimna chu Amahah a intan ve nghal tih a sawi a ni.

 1.  Matthaia 1: 23 thu chuan heti hian a sawi a: “Ngai teh, Nula thianghlim a rai ang a, Fapa a hring ang a, A hmingah chuan Emmanuela an sa ang” ti a a sawi kha alo thleng theihna turin chung zawng zawng chu alo thleng ta a ni. Emmanuela chu “Kan hnena Pathian awm” tihna a ni. A pian hlim atang khan “Kan hnena Pathian awm” a ni daih tawh a ni.

2.   A pian hlimah Vantirhkohte pawhin chibai an buk a ni (Hebrai 1:6). Simeona khan nausen anih lai khan Krista chu a ni tih a hre daih tawh bawk a (Luka 2:26), Anna khan nausen a nih lai khan Israelte tlantu a ni tih a hmu bawk a (Luka 2:38), Mifingte pawh khan nausen chu chibai an rawn buk bawk a (Matthaia 2:11).

3.  Mika 5:2 thu hian Messia chu Bethlehema alo pian veleh khan Pathianna chu a bel nghal a, Nazareth a a seilen phawt hnuah nilovin, Jordan luia Baptisma a chan atang pawh ni hek lovin

.

4.  Luka 1:35 thu hian Isuan mihring nun bul a tan ve leh Pathian anih chhan a sawi a, Vantirhkoh khan Mari hnenah “Thlarau Thianghlim chu I chungah alo ang a, Chungnungbera thiltihtheihnain a hliahkhuh ang che; chuvangin mi thianghlim lo piang tur pawh chu Pathian Fapa an ti ang” a ti a. Isua chu nula thianghlim lak atangin alo piang a, Thlarau Thianghlim paitir a ni a, “Chuvangin” tih thu ang khan Pathian Fapa a ni. Kawng dangin han sawi leh ila, Isua hi Pathian Fapa a ni, a chhan chu, mihring ni lo, Pathian ngei chuan a paitir avangin. A ngial a ngan a Pa chu Pathian a ni. “Pathianin khawvel a hmangaih em em a, chutichuan a Fapa mal neihchhun a pe a” tih ziak ang khan (Johana 3:16). Hring awmzia chu Pa nihtir, fa hring, nunna pe, siam tihte a ni. Nula thianghlim Mari pumchhungah Pathianin Isua chu a hring a ni.

  Isaia 7:14 thu pawh hian nula thianghlim naupai lo piang tur chu Pathian anih tur alo hre lawk a. Kawng danga sawi chuan hmeichhe chiah khan Pathianin a Pathianna mize chi chu a dah a naute lo piang tur chuan nunna alo nei ta a, Pathian nungchang chu a Pa lam atangin a chhawm ta nghal bawk a. A nu Mari hnen atangin mihring mizia leh nungchang a chhawm a, Pa (Pathian, Josefa nilo) hnen atangin Pathian mizia leh nungchang a chhawm bawk a. Isuan a Pa mizia chu a thanlenpui zel a, a hnu hun engemaw khaihlak laia Pathian thiltih avanga a Pathianna lo intan ta  a ni lo. Nula thianghlim hrin a nihna khan a Pathianna a nemnghet a ni.

Mi thenkhat chuan Pathianna famkim chu a hun hman chhohnaah Baptisma a chan atang khan anei chauh niin an ngai thin. Amaherawhchu nula thianghlim hrin a nihna leh Luka 1:35 thu ang khan chutiang chu a ni thei si lo. Pathian mizia leh mihring mizia chu puma pai anih lai khan a nei kawp nghal daih tawh a ni. Isuan Baptisma a chan laia Thlarau Thianghlim Thuro anga alo chhuk tum kha Thlarau Thianghlim Baptisma a channa a ni hauh lo a ni; Isua chuan Pathian famkimna zawng zawng chu alo nei sa vek tawh zawk a ni (Kolossa 2:9). Baptisma a chan laia thil lo awm kha chu leia rawng a bawl dawn a hriakthih tih entirna leh Baptistu Johana’n Pathian anihzia alo hriattheihna tura chhinchhiahna a ni (Johana 1:32-34)

.

THUTHLUNG HLUIA PATHIAN KHA ISUA NGEI HI A NI, rinhlelh tur a awm love :

     (a)    Pathian chu thilsiamtu a ni (Genesis 1:1, 2:7)

       Isua chu thilsiamtu a ni (Thupuan 4:8; I Korinth 8:6; John 1:10)

    

     (b)   Pathian chu tlantu leh chhandamtu a ni (Isaia 47:4; 43:11).

     Isua chu tlantu leh Chhandamtu a ni. (Galatia 3:3; John 4:42; Luka 2:10; I John 4:4).

    

    (c)    Pathian chu hmasabera leh hnuhnung ber a ni (Isaia 44:6, 41:4).

     Isua chu hmasaber leh hnuhnung ber a ni (Thupuan 22:13, 1:17).

    

    (d)   Pathian chu cheng 30 man (Zakaria 11:13)  

     Isua chu cheng 30 man (Matthaia 27:3-18).  

    

    (e)   Pathian chu lokal leh tur a ni (Zakaria 14:4; Sam 50; I Thes. 4:13-18)

     Isua chu lokal leh tur a ni (Hebrai 9:27-28; Tita 2:11-13).  

    

    (f)     Pathian chu lungpui a ni (Isaia 44:8).        

     Isua chu lungpui a ni (I Korinth 10:4).

ISUA HMING HI

Hunbi alo kimin, Pathianin ama mite tuihalna chu a ti lungawi ta a, tichuan Isua hming kaltlang hian A thiltihtheihna zawng zawng leh A ropuina zawng zawngte chu a inpuang lang fai ta vek a ni. Isua (Jesus) tih hi Greek tawng a ni a, Hebrai tawnga a tlukpui hrang hrangte chu Jehoshua (Numner 13:16), Jeshua (Ezra 2:2) emaw Joshua (Exodus 17:9) te an ni. Tirhkohte 7:45 thu leh Hebrai 4:8 thu hian Isua (Jesus) tih chu Joshua tih nen in ang reng a ni tih an tilang thei bawk. (NIV Bible-ah en bawk ila).

Isua tih awmzia chu Jehova-Chhandamtu, Jehova kan chhandamna tih emaw Jehova hi Chhandamna chu a ni  tihna a ni. Hemi avang hian Vantirhkoh pawh khan “Fapa a hring ang a, Ani chuan a mite chu an thiltih sual lakah a chhandam dawn si a” an ti a nih kha (Matthaia 1:21). Isua tih hi chhandamna tihna a ni tih tilang chiangtu chu Hebrai tawnga a tlukpui Jeshua tih hi a ni a, chumi awmzia chu Chhandamna tih nen a intluk tlat a ni. Hebrai Hawrawpah hian hmanlai chuan Vowel (tawng awmze neia rik tirtu) an hman ve loh avangin chu chu a kawk a ni tih hriat a harsa a.

Strong’s Exhaustive Concordance lehkhabu chuan Jeshua tih hi Yeshuwa tiin a dah a, chu chu Hebrai tawng chhandamna tihna anga hman theih, Yeshuwah tih nen a inang a ni. Midangin Jehoshua tihte, Isua hmingte pu ve mahsela Isua Krista chauh hi he hming awmzia phawk phak awm chhun a ni a. Amah chauh hian he hming hi a phu a ni.  

Isua tih hi Thuthlung Hluia Pathian hming zawng zawng khaikhawmna chu a ni. Mihringte hnena hming puanchhuah zingah chuan a chungnung ber a, a sangber bawk a ni. “Ka mite chuan ka hming an hria ang”  (Isaia 52:6) tia Pathianin a hming puan alo tiam tawh kha Isua hming hi a ni tih kan hre thei a ni. Zakaria 14:9 thuin a sawi Pathian hming dang zawng zawngte awmze keng zo vektu chu Isua hming hi a ni.

Thuthlung Thar Kohhran chu Isua hminga chhinchhiah tlat a ni. Isuan ama hming avangin mi zawng zawng huat kan nih tur thu min hrilh a ni (Matthaia 10:22). Kohhran hmasa kha Isua hming avanga tihduhdah a ni a (Tirhkohte 5;28; 9:21; 15:26), ama hming avanga tihduhdahnate tuar tlaka ruat an nih avangin vannei an inte hle a ni (Tirhkohte 5:41). Mawi kawngkhar bula kebai kha “Nazareth Isua hminga” lo dam tura tih anih thu Petera’n a sawi a (Tirhkohte 4:10). Chhandamna chang turin he hming hi a chungnungin a tul a ni tih a hrilhfiah nghal bawk a:

                                     “Midang tuma hnenah Chhandamna a awm lova,

                                                Van hnuaia mihring sak zingan,

 min chhandam tur hming dang reng reng a awm lo” tiin 

(Tirhkohte 4:12).

Paula pawhin:

“Chumi avang chuan Isua hmingin mitin –

Vana mite, Leia mite, Lei hnuaia mite nen

An thingthit nan leh Pa Pathian tihropuina turin

“Isua Krista chu Lal a ni” tiin Lei tinrengin an puan nan

Pathianin ani chu nasatakin a chawimawi ve ta thung a,

Hming zawng zawnga hming chungnungber chu a pe ta a ni,”

Tiin alo sawi bawk kha (Philippi 2:9-10)

He hming hi chawisan a nih avangin Keini pawh kan thiltih leh thil sawi zawng zawng pawh Isua hminga innghat fai vek tura hrilh kan ni a:

                                  “In thiltih apiang chu

                                  Thusawiah emaw thiltihah emaw

                                  Ama zarah Pa Pathian hnena lawmthu hril chungin

                                  Lalpa Isua hmingin ti vek rawh u,” tiin (Kolossa 3:17)

Isua hmingin kan zirtir a, kan hril bawk a (Tirhkohte 4:17-18; 5:28). Isua hmingin ramhuai kan hnawtchhuak a, tawnghriatlohvin kan tawng bawk a, engkim Isua  hmingin kan ti vek thin a ni (Marka 16:17-28; Jakoba 5:14). Chhinchhiahna leh thi makte pawh Isua hminga tih vek a ni (Tirhkohte 4:30). Dilna leh ngennate Isua hmingin A Pathianna hnenah kan hriattir vek thin a ni (Johana 14:13,14; 16:23 en ngei la). Isua hmingin kan inhmukhawm thin tur a ni a (Matthaia 18:20). Isua hming ngei hian baptisma pawh kan chang tur a ni (Tirhkohte 2:38).

Isua hming hi dawithiam hmanrua ang chi a ni ta em ni? Ni si lo. Thiltihtheihna atan Isua hming hmang tur chuan a hmingah rinna kan neih a pawimawh a ni (Tirhkohte 3:16). Kha hming khan tu ai nge a awh tih kan hre ngei tur a ni a, chu hming neituah chuan kan rinna kan ngat tur a ni bawk a ni (Tirhkohte 19:13-17). Isua hming hi chu a danglam bik a, a hming neitu hi a hmingah hian a awm tlat reng bik a ni. Pathian chenchilhna leh thiltihtheihna leh a hnathawh aiawh a ni. Rinna Isua hming kan lam hian Amah ngei chu a awm ngal a, hna a thawk nghal thin a ni. Thiltihtheihna chu a hming lam vang ringawtin alo kal a ni lova; amaherawhchu Isua hnathawh rinna avang leh Pathian thu zawmna atanga hming kan lam erawh chuan thiltihtheihna chu alo awm thin a ni. Rinnaa a hming kan lam chuan Isua alo chen ve nghal a, thil min tihsak a, kan mamawh min pe thin a ni.

Tichuan Pathian chu Isua hming kaltlang hian a famkimin a inpuangchhuak thin a ni. Isua kan hmuh leh kan hriat leh, kan chawimawi leh kan rin leh kan lawm dan a nasat lam ang chiah chu Pa Pathian kan hmuh leh hriat leh chawimawi leh lawm nasat dan chu a ni (Johana 5:23; 18:19; 12:44-45; 13:20; 14:7-9). Isua kan phatsan chuan Pa chu kan phatsan tihna  ani ngal a (Johana 2:23). Mahse Isua hming chu kan hman chuan Pa chu kan chawimawi a ni (Kol 3:17).

Messia chuan LALPA hming chu a puangzar dawn a ni tih chu Bible hian alo sawi lawk a (Sam 22:22; Hebrai 2:12).  Isua chuan Pa hming chu a tilang a, a puang bawk a (Johana 17:6,26). A hming hian Pa hming a pu a, (Pa hming chu a hmingah a hmang a) (Hebrai 1:4). Engtinnge Isuan Pa hming a tihlanna a puan? Jehova hna a thawh hmangin Pa hming chu a ti lang a ni (Johana 14:10-11). Thuthlung Hlui hun lama ama miten an mamawh ang zia zela Pathianin a mizia leh a hming a inlanfiahtir ang tho khan Thuthlung Thar hunah pawh Isua chuan thilmak tih leh tihdamnate, ramhuai hnawhchhuah leh sual ngaihdamnate hmangin Pathian anihzia a tilang a, Pathian hming chu a puangchhuak famkim ta a ni. Isuan Pa hming chu a hnathawhin a tilang a. Thuthlung Hluia Jehova ngei kha a ni tih a tilang a ni (Isaia 35:4-6; Luka 7:19-22). Zawlneite hrilhlawkna angin Pathian thiltihtheihna hrilhfiah pah zelin Pa hming chu Isua hi a ni tih a tilang ta a ni.

Anih leh engtinnge Isua hi Pathian inpuanchhuahna famkim hming anih theih? Isua hi Jehova kha anih vang mai a ni a, Pathian Pathianna zawng zawng chu a famkimin taksa neiin Isua ah a awm a, Pa a nihnaa a hnathawh zawng zawng pawh a huap vek a ni (Kolossa 2:9). Hei hi Isua hi Pathian a ni tih thu ah kan la zir chiang dawn a ni.

-                                                                                                               -            The Onenes of God by David K. Bernard