YAHWEH (JEHOVAH)

Yahweh (Jehovah) tih hi Thuthlung Hlui huna tlanchhuahna hna Pathianin a thawhna hming atan a hmang a (Exodus 6:3-8), Pathian dangte lak atanga in la hrang nalh Pathian diktak chauh a nih bik zia tihlanna hming chungnung bik atan Thuthlung Hlui hian a hmang a ni (Isaia 42:8). Jehovah hming awmzia chu ‘Mahnia lo awm chawp tihna emaw Chatuan mi’  tihna a ni. Hemi tlukpui hi thudang a la awm a, “AWMA KA NI” tih leh “AWMA” tih thu hi. Hei hi amah insawi nan Pathianin a hmang a ni

                Fladers leh Cresson chuan Yahweh tih awmzia an hrilhfiah a, Hebrai tawngah chuan Yahweh awmzia chu “Lo la awm tura” tihna ang a ni an ti. Yahweh awmzia chu Amah a ni, A ni, tihna a ni. Pathian ngeiin he thu hi a hman ve erawh chuan a sawitu a nih avangin thiltitu angina a tawng a, Ka ni, Ka awm, Keimah ka ni” a tihna a ni. Tichuan Yahweh tih leh keimah ka ni tih chu hming hrang awmze thuhmun a ni. Heng hmingte hian Pathian chu awm satliah mai lam aiin thil tia che chhuak reng a nihna a keng tel zawk a ni.

                Sap tawng Bible King James Version(KJV) ah chuan Jah tih hi Jehovah lam tawi angin vawi khat chiah a chuang a (Sam 68:4). Jehova tiin KJV ah hian vawi li a chuang a(Exodus 6:3; Sam83:18; Isaia 12:2, 26:4), tin, hming chawhpawlhin vawi thum a chuang bawk a(Genesis 22:14, Exodus17:15, Roreltu 6:24), hmun dang zawngah chuan King James Bible letlingtu hian YHWEH tih leh a lamtawi YH tih hi PATHIAN tiin emaw LALPA tiin hawrawppui lian emaw tein emaw an dah a. LALPA tih hi an hmang tam ber a, entirnan, Genesis 2:4. Tawngkam thu pangngai hman lai a Adonai (Lalpa) tih a lo lan ve chuan PATHIAN tiin an dah zawk thin. Entirnan, Aw, LALPA, PATHIAN tiin. (Genesis 15:2)

                YHWH tih aiah LALPA tih hman a nih hian Judaten YHWH sawi nan Adonai (Lalpa) tih an hmang thin ang hi a ni a, Pathian Lehkha Thu an ziak chhawn lai leh an chhiar laiin an hmang thin a ni.He tih dan hi Pathian hming lam mai mai an nih loh nan an invenna  a ni a, PATHIAN hming anarana an sawi chuan Thupek Pathumna an bawhchhe dawn si a (Exodus 20:7). PATHIAN hming sawi serh lutuk kha an lam cham chi mai zawngin ho takin an hmang chhehchhawl lutuk ang tih an hlauthawng a ni. Pathian hming chu a thianghlim em em a, a zahawm bawk si a, Chuvangin a hming chu hmang tlakah an inngai lo a ni.

                Hmanlaia Hebrai hawrawp ve ah chuan thu lamrik dan siamtu (Vowels) an nei ve lova, chuvangin hming zahawm (YHWH) an sawichhuah dawn chuan an tawnglai chu an tawp chawt thin a, chuvangin YHWH tih lamrik dan bul thum diktak hi mi tumahin an hre thei tawh lo a ni.

                Pathian hming kan neih theih chhun chu Hebrai hawrawp pali (Tetragrammaton an ti a) a rik dan tlukpui tawng dang hawrawp hmangin an dah ta a, YHWH tiin emaw JHVH tiin an dah a, Hebrai tawng chuan Yahweh tih angina a ri a, Sap tawng chuan Jehovah tih angina an lam ta mai thin a ni.

                                                                                                            Excerpt from The Oneness of God