PATHIANIN ‘KAN’ TIH TAWNGKAM A HMAN CHUNGCHANG:

      Gen. 1:26-27 ah Pathianin mihring a siam dawn khan “Kan anpuiin, keimahni ang takin mihring siam ila” tih tawngkam a hmang tlat mai a, pakhat aia tam sawina ‘Kan’ (plural) tih a hman tlat avangin Pathian pakhata minung pathumte chu inbe rawna, “Kan anpuiin……… mihring siam ila,” tita niah ngaih a awl hle mai a. Mahse, Genesis 1:27-ah a mihring siam chu, “Ama anpuiiin ngeiin a siam a ni,” tih kan hmu a. Ama anpuia a siam, Adama chu minung pakhat, taksa pakhat nei a nih miau avangin Pathian chu pakhat ngei a ni tih a tichiang a. Pathian pakhata minung pathum awmin, chung mite pathum chu thil tih theih dan intluktlang, inbe rawn ni tak tak se, a anpui chiaha a siam Adama (mihring) hi minung pathum a ni ang a, mahni hi kan inbe rawn tluar tluar ngei ang !! Pathianin ama anpui chiaha a siam mihring chu minung pakhat chiah a nih avangin Pathian pawh pakhat a ni tih a chiang hle a ni.

         

 Tin, ‘kan’ (we) tih (plural form) a hman avang hian Pathian kha pakhat aia tam (mi nung pathum) a ni tihna a ni kher chuang lo. Kan bula awmte a zirin mihring pawhin ‘Kan’ tih tawngkam hi hman tul chang a tam mai, “Delhi-ah kan zin a,” ka tih avangin mi nung pathum ka ni chuang lova, ka bula kal vete chhal telin ‘kan’ tih kha ka hmang mai zawk a ni. Inkhawmna leh puipunnaah ka tawngtai dawn a, “Ilo tawngtai ang u” ka tih chuan ‘ang u’ tih hi mi pakhat aia tam sawina anih rualin mahni chauvin ka tawngtai ta si a, mi nung pathum ka ni tihna a ni chuang lo. ‘Ang u’ tih ka hman khan ka bula awmte sawi telin (plural form) pakhat aia tam sawina ka hmang mai thin ang hian, kan Pathian pawhin mihring a siam dawn hian a bula awm vantirhkoh ho, a rawngbawl saktute hriattir vein – “Kan anpuiin mihring siam ila’ ati mai zawk a ni. A siamtu tak tak chu amah Pathian kha anih avangin, “Ama anpui ngeiin a siam a ni,” tiin mi pakhat (singular) anihzia a tarlang leh mai a ni. Pathianin ‘kan’ tih tawngkam a hman ve avangin buai tur a ni chuang lo.

               

 Isaia 6:8-9 thuah Lalpa awin, “Tunge ka tirh ang a, tunge ka tan kal ang?” a tih thu zawlnei Isaia’n a hre tlat mai, “Tunge kan tan kal ang?” Pathianin a tih miau si chuan Pathian pakhatah minung pathum a awm ang a, an inbe rawn ang a, an aiawha tirh tur dapin, “Tunge kan tan kal ang” ati mai turah ngaih a awl hle a. He Bible chang mal ngawt thlir hi chuan ngaih sual palh theih tak a ni ve leh a. Isaia 6:2 atangin chhiar ta ila “A kiangah (Pathian kiangah) chuan Serafte an ding a, thla paruk an nei theuh va, an thla pahnihin an hmai an khuh a, pahnihin an ke pahnihte an khuh a, pahnihin an thlawk a, tin, ‘Sipaihote Lalpa chu a thianghlim e,’ tiin an inau tawn an inau tawn a,” tih kan hmu a. A sawi zelnaah, “Chutichuan seraf pakhat maicham ata chaicheha cheh meiling kengin ka hnenah alo thlawk a, ka han dep a,” tiin a sawi zel bawk a.  

                

 Zawlnei Isaia hmuh angin Pathian hi amah chauhvin a awm ngai lova, a kiangah vantirhkoh an awm ve ziah thin a. Pathian hnam thlan Juda-te’n Pathian an tih lungnih loh avangin zilhna pe tur palai hna thawk turin mihring ngei (zawlnei) tirh a duh si a. (Mi hausa Lazara chungchang tehkhinnaah pawh, “Mosia leh zawlneite an nei alawm, chu mite thu chu ngai rawh se,” (Luka 16:29) tiin palaiah mihring a rin tlat zel kha). Van mite aiawha palai kal tur a zawn avangin – “Tunge ka tirh ang a, tunge kan tan kal ang?” tih angai tlat a. Pathian pakhata mi nung pathum awm ang a ngaih tur a ni lo. Tirh tumtu Pathian chu pakhat anih avangin, “Tunge ka tirh ang a,” ati a. Van mite aiawha a tirh dawn avangin, “Tunge kan tan kal ang” ati ta a, tawngkam diktak a ni zawk a ni.

                 

Nehemia 2:17 thuah Nehemia’n Jerusalem kulh tung ding leh sa tha tura a belh lai khan, “Hawh u, sawi chhiat kan nih tawh lohnan Jerusalem kulh chu I din leh ang u,” tiin a au va. ‘Hawh u’ tih leh ‘I din leh ang u’ tih tawngkam hmang siin amah chauhvin a au si a. Nehemia kha mi nung pathum (Trinity) niin a inberawn ta em ni?? Ti ta ila, zawhna atthlak a ni ngei ang. A bula awm Juda-te Jerusalem kulh sa tha turin a sawm mai a ni zawk. Chuvangin Pathianin , “Hawh u, kan anpuiin mihring siam ila,” atihte, zawlnei Isaia’n, “Tunge ka tirh anga, tunge kan tan kal ang,” tia Pathian aw a hriatte, Nehemia’n, “Hawh u, Jerusalem kulh chu I din leh ang u,” a tihte hi an bula awmte vanga mi pakhat aia tam sawina tawngkam hmang mai an ni a, mi nung pathum (trinity) anga ngaih chi a ni reng reng lo a ni. 

                                                                                                                           - source Oneness Theology by Pastor R. Sangthanga

                                                                                                               

               

BIBLE KAN NEIH DAN

    A ziak dan :

Kan Bible-a lehkhabu chi hrang hrang 66 infinkhawmte hi, mi thiam tuten emaw an finna hmanga an ziak a ni satliah mai lova. Kum 1600 chhung vel mi hrang hrang 40 velin hun hrang hranga an ziak a ni. Bible-a lehkhabu hmasa ber ziaktu, Mosia hian 1500 BC lai vel khan Pathian thawkkhumna hnuaiah alo ziak a, Apostol Johana chuan a hnena Pathian inlarna famkim chu AD 97 velah khan a ziak bawk a ni. Pathianin mi chi hrang hrang, Beram Vengtute, lalte, puithiamte, zawlneite, lo neitute, sangha mantute, damdawi lam thiamte, chhiahkhawntute, dan hre mi leh zirtirtute a thu ziak tur hian a hmang a. Chutiang chuan mi hrang hrangten hun hrang hrang leh hmun hrang hrang a kum tamtak chhung an ziak ni mahse hruaitu ropui tak, Thlarau Thianghlim hruaina hnuaia ziak anih avangin thil diklo, thu inkalh leh fel lo Bible-ah hian a awm lo a ni.

Thuthlung Hlui lam hi Hebrai tawng  ziak a ni ber a, amaherawhchu heng: Jeremia 10:11; Daniela 2:4-7:28 leh Ezra 4:8 – 6:18 te hi chu Aramic tawngin an ziak thung a ni. Tin, Thuthlung Thar bu lam hi Greek tawnga ziak a ni a. Hemi a nih avang hian theology zirtute chuan atira Bible ziahna, tawng bul hi an zir tel deuh zela. Hebrai tawng chuan tihte, Greek tawng chuan tihte a ngaih fona chhan chu atira Bible an ziakna tawng a nih vang mai a ni. Heng Hebrai leh Greek tawngte hi khawvel hnam tawng pakhat ve mai a ni a, tawng tha chungchuang a ni bik chuang lo a ni.

Bible hi Pathian thawkkhuma ziak a ni:

Bible hi mihring atanga lo piang chhuak a ni mai lo va, Pathian atanga lo chhuak a ni. Chumi Pathian atanga lo chuak a nihna tak chu thawkkhum anihna chu a ni. Bible ngei hian, “Pathian lehkha thu zawng zawng hi Pathian thawkkhuma pek a ni,” tiin a sawi a (II Tim. 3:16). Heta Pathian thawkkhum, tih hi Greek tawng chuan “Theopneutos” (Thiaw-nius-taws) tiin a sawi a, a awmzia chu “Pathian thawk chhuah,”  tihna a ni. Mihring ka atanga thaw lo chhuak riin thu a sawi angin, Pathian lehkha thute hi Pathian atanga lo chhuak thu ngei chu a ni. Petera chuan Pathianin a thu puangchhuak tura a thawkkhum dan hetiang hian a sawi a ni. “Thu hrilhlawk reng reng hi mihring thua chhuak a ni ngai si lo va, miten Thlarau Thianghlim tirhin Pathian hnen ata an sawi zawk thin,” tiin (II Pet. 1:21)

William Evans-an a lehkhabu ziak, Great Doctrines of the Bible-ah chuan thawkkhum tih zirtirna hi tawi fel leh awmze nei takin hetiang hian a ziak a, a dik hmel hle a ni:

“Pathian mi thianghlim, Thlarau chhunkhaha awmte chuan Pathian thupek ang thlapa an ziah avangin, thutak an hriat tawh thin a ni emaw, nilo emaw a lem chuang lo, adik lo thei lo a ni,” tiin.

Thuthlung Hlui bu Canon a nih dan :

‘Canon’ tih hi Greek tawng atanga lak a ni a, a awmzia chu ‘tehna luang tiang’ emaw ‘tehna thirtiang’ tihna a ni. Pathian Lehkha lam sawina atana hman anih chuan “Bible-a tel tura lehkhabu pawm chin” tihna a ni mai. Pathian Lehkhabu a tel tura lehkhabu an tehna hmanrua ber pakhat chu Pathian thawkkhum ngeia ziak leh thutak pawm tlak a ni em? Tih hi a ni.

Canon tih tawngkam hiThuthlung Thar huna hman tan chauh a ni a, mahse Pathian thawkkhum lehkhabu lo awm tawhte chu Israel chanchin atanga chhui kirin an pawm (recognize) mai a ni. Thuthlung lehkhabute an lak khawm dan chu hetiang hi a ni: Tuna Thuthlung Hlui bu 39 kan neihte bakah pawh hian Apocrypha (Apokrifa) bute leh bu dang dangte nen bu 73 lai mai lakkhawm a ni a. AD 90-ah khan Juda hoten Jaminia khuaah inkhawmpui an nei a, tuna kan Bible ami Genesis atanga Malakia thleng bu 39 chin zawng hi an pawm a, a dang zawng chu an hnawl ta a ni. Heng lehkhabu Judate’n an lo pawm hote hi Kohhran alo ding hnua Thuthlugn Hlui bu Canon a nih lai pawhin an pawm zui ta a ni.

Thuthlung Thar bu Canon a nih dan :

Thuthlung Thar bu Canon anih lai hian Pathian thawkkhum, thutak pawm tlak a ni tur a ni tih chu tehfung awmsa ni mahse thawkkhum han tihah pawh ngaihdan a phirsi theih avangin, tehfung pawimawh tak tak pathum an nei a, chungte chu hengte hi an ni:

1) Apostolte emaw an kaihhruaite emaw ziak a ni ngei tur a ni. Chanchin Tha Luka ziak leh Tirhkihte Thiltih chu a ziaktu Luka chu Paula nen an thawh dunna ngaihtuahin an pawm a, Marka pawh Petera leh Paulate nen an thawh hona ngaihtuahin a Chanchin Tha ziak chu an paw a ni a. Matthaia leh Johanate chu Apostol an nih avangin an Chanchin Tha ziak chu an pawm nghal a ni.

2) Apostolte hunlai atanga kohhran tamtak ten an pawm leh Pathian biakna atana an hman a ni tur a ni.

3) A bu chhung thu chu pawmtlak leh innghahna tlak a ni tur a ni.

Thuthlung Hlui nena inla lawn, Isua Krista Chanchin Tha zirtirna laipui, kohhranten an humhalh lai zui anih loh chuan tu ziak pawh nise an hnawl mai a ni.

Bible bung leh chang then thu:

Thuthlung Hlui lam ziakna Hebrai tawng hi a tirah chuan vowel (a,e, i, o, u ang chi) tel lo, consonant ringawta ziak a ni a, Hebrai hote hian vowel hawrawp an nei lo a, thumal hrang hrangte then hranna pawh awm lovin an ziak zawm put mai a, chhiar a har em em a ni. Jehova tih hming pawh hi mawl tein ‘JHVH’ tiin an ziak mai a ni. Massorete – hoten Hebrai vowel an siam chhuah hnu, tlai khaw hnuah a tulna hmun niawm laiah vowel hi an zep tel ta a ni. Chutiang bawk chuan Thuthlung Thar bu lam pawh hithen fel awm lova inzawm deuh put tho mai a ni a. Bible lama mithiam leh taima ten a bung leh chang siamin tuna kan hman ang hian an lo siam chhuak ta a ni.

Kan Bible-ah hian bung 1189 a awm a, hei hi Stephan Langdon-a AD.1227-a thi tain a ruahman nia hriat a ni a.A tir lamah thenkhat chuan Cardinal Sancto-a, AD 1263-a thi ta khan a ruahman niin an ngaia. Mahse Stephan Langdon-a siam ngei niin tun thlengin rin a nit a zawk a ni. Heng Bible bungte hi Latin Concordance buatsaihna atana then a ni a. A bung then hlawm thenkhatte hi chu duhthu a sam lo hle a, mahse lehlin dang zelah pawh pawm a ni chho ta zel a ni.

Kan Bible-ah hian chang 31,163 a awm a, heng change hi Sir Robert Stevens-an AD 1550-a a then a ni a. Geneva Bible AD 1560 kuma an chhut chu Bible chang awmna an chhut hmasak ber a ni.

Bible bu hmasa leh lehlin hmasate:

Kutziak lehkhabu (Manuscripts):  A tirah chuanBible hi savun lehkha sei pui pui maiah ziak a ni a, chu chu dah that awlsam turin thing mumin an s=zial mai thin a, hei hi “Manuscript” an ti a, a awmzia chu ‘Kut lawng ziak’ tihna a ni. Heng kutziak lehkhabua Pathian thu ziak chhawngtute hi “Lehkhaziaktu” (Scribe) an ti a ni. Savun lehkha siam nan hian kel vunte, bawng vunte (sa thiang chi ho vun) an hmang thin a ni. Hun alo kal zeal, mihring an lo fing tial tial a, phairuang hnim chi khat, papyrus pil hmangin lehkha siam dan an lo hre chhuak ta zel a, Pathian lehkhabu siam dan pawh a changkang chho ve hret hret zel a ni. Heng savun lehkha zial chite hi ‘Lehkha zial’ (Scroll) tia hriat lar a ni. Hebrai kutziakbu an ziah chhawnnaah hian Juda lehkhaziaktute chu theihtawpin an fimkhur a ni. Kutziakbu thar zelte chu Kutziakbu a dik ngei a ni tih pawm tawh, sathing vuna hlo tui tha bik chia an ziak tawh sa entawn zeal siam tur a ni a. Thumal tin an ziah dawnin a ziaktuten ring takin thumal an ziah tur chu an chhiar hmasa phawt thin a, a chhan chu thumal pakhat mah anmahniin an lo hriat belh tawh sa hmangin an ziak tur a ni lo.

Bible Manuscript

Pathian hming aiawh atana an hman thin engpawh an ziak dawnin an pen chu zah takin an hru fai hmasa phawt zel tur a ni a, ‘Jehova’ tih hming an ziak dawn phei chuan an pumin an inbual fai hmasa phawt zel tur a ni. Chutianga an ziah zawh hlimte chu a tira bu (Original) nen fimkhur takin an en mil a, hawrawp pakhat lek ziak sual palh alo awm pawhin a bu pumpui chu an hnawl mai thin. Chutiang khawpa lehkhaziaktute an fimkhur thin avang hian Kutziak lehkhabute hi chu sual lo tluka ngaih a ni.

Sptuagint hawrawp

Septuagint: Thuthlung Hlui bu hi 277 BC lai velah khan mi thiam (scholar) sawmsarih rual ten Aigupta rama Alexandria khuaah  Greek tawngon an letling a, hei hi tawng danga Thuthlung Hlui lehlin hmasa ber a ni. Hemi Greek twang Thuthlung Hlui bu an lehlin hi ‘Septuagint’ tia hriat lar a nit a a. Latin tawng ‘Septuaginta’  tih chu ‘Sawmsarih’ tihna a ni a, heta tang hian ‘Septuagint’ tih hi a lo kal ni a hriat a ni. Roman number a sawmsarih ‘LXX’ hi Septuagint Version sawina atan pawh hman thin a ni a, hei hi a chhan chu he lehlin hna thawktu mi Sawmsarih pahnih an nih vanga a hming atan pawh hmang mai an ni. Septuagint hi zau taka thehdarh alo ni ta a, hun lo kal zelah lehlinna tamtak chuan behchhan atan an hmang ta a ni.

Septuagint ah hian Bible chhunga lehkhabu hrang hrang hming kan hriat lar tak takte hi hman thin a ni a, a bu indawta an lo siam pawh chu atira Hebrai ho kutziak bun en danglam mahse tun thlengin zui zel a ni ta a ni.

Vulgate: Thuthlug Hlui bu chu Septuagint version leh Thuthlung Thar bu Greek tawng original chu Latin tawngin AD kum zabi 2-na velah khan an letling leh a, chu chu ‘Vulgate’ an ti a, a awmzia chu ‘ti tlanglawn’ emaw ‘Vantlang hman tura siam’ tihna a ni. He lehlin hi North Africa-ah siam a ni a, kum zabi 4-na lai velah khan hetih hunlaia lehkhathiam ropui ni a an sawi Jerome-an a ennawn a. Kum sangkhat chhung zet chu Catholic Kohhranten he Vulgate Bible hi an hman ber a ni. Mi naran chuan Latin tawng hi an chhiar thei lova, hruaituin mipui tan a chhiar mai thin a ni. Hun Thim (Dark Age) hun chhung zawng khan Pathin thu chu Latin tawng hmanga hren beh tlat a ni.

Anglo Saxon tawng lehlin hmasa ber: Anglo Saxon tawng hi AD 450-ah khan England ramah anmahni run tuten an rawn la lut a. Hetih lai hian Pathian thu chu Latin Vulgate kutziak Bible chauh a awm a, mithiam leh hausate tan bak neih theih anih si loh avangin, kum zabi pariatnaah khan Vunerable Bede-a, chutih laia mithiam hmingthang chuan Sam bu leh Chanchin Tha bute hi Anglo Saxon tawngin a letling a. AD 735-ah a thi ta a. A thih hnuah England lal Alfred Ropuia an tih chuan Bible pumpui Anglo Saxon twang lehlin siam chhuak turin thupek a siam a, an lehlin zawh hmu hman lovin Alexander Ropuia pawh hian a boralsan ve leh ta a ni.

England ram chu Norman hoten William Hnehtu-a (William the Conqueror) hovin AD 1066-ah khan an hneh a, chumi atang chuan sap tawng (English) hi an rawn hmang chho ta a, sakhaw rawngbawltu (Puithiam) te chawisanna ram alo ni ta a ni.

Sap tawng lehlin hmasa ber: Kum zabi 14-naah khan JohnWyclif-a (1330-1384), hetih hunlaia mithiam hmingthang leh Oxford-a lecturer hna thawktu chuan Bible pumpui hi Latin Vulgate atangin Sap tawng (English) in a letling a, hei hi sap tawng a Bible lehlin hmasa ber a ni. Chutiang kutziak bu chu 150 vel lai an siam chhuak a. John Wyclif-an Sap tawng Bible lehlin a siam hnuah hian Sap tawng lehlin dang leh tawng dang danga lehlin paw halo chhuah belh ta zel a ni.

Lehkha chhutna khawl (Printing Press) hmuhchhuah thu: Lehkha chhutna khawl (Printing Press) hi Europe ramah AD 1450-ah khan German mi, John Gutenberg-a (AD 1400-1468), Mainz khaw mi, Bible siam buaipuitu nia an sawi chuan a hmuchhuak ta hlauh mai a. He Printing Press hmuhchhuah hian Bible siam chhuahna kawngah nasa takin a tanpui a, Pathian lehkhabu theh darhna nasa takin a tipung ta a ni. Hemi hma lam hi chuan kutin an ziak chhawng mai thin a, ziak tam a har em em a ni. England ramah chuan Printing Press hi AD 1476 ah khan William Caxton-a (AD 1422-1491) chuan a hmang tan ta a, Thuthlung Hlui bu thenkhat chu Hebrai tawng chhut a ni ta a ni.

        

                                                                                     --- Excerpt from Kohhran Chanchin by Rev. R. Lalrinsanga

A TIRIN THU A AWM

    Johana bung khat thu hian Pathian tisaa alo channa rilru chu chiang takin min zirtir a. A tirin Thu a awm (Thu hi Greek tawng chuan Logos a ni a). Mihring thu hi mihring atangin mihran a ni lo ang bawk hian Pathian thu hi Pathian lak atanga Pathian dang emaw midang emaw a ni thei bik chuang lo. Pathian rilru leh Pathian remruatna leh ngaihtuahna chu Thu (Logos) chu a ni.  A tirin Thu chu Pathian thinlung chhungah Pathian hnenah chuan a awm a, Thu chu amah Pathian ngei chu a ni (Johana 1:1). Khawvel awm hma atang daih tawhin  mihringa lo chan chu Pathian rilruah chuan alo awm daih tawh a ni. Khawvel leilung nghahchhan phum hmain Pathian Beram No chu Pathian rilruah chuan talhin a awm daih tawh a ni. Khawvel leilung nghahchhan phum hmain Pathian Beram No chu Pathian rilruah chuan talhin a awm daih tawh a ni (I Petera 1:19-20; Thupuan 13:8).

                Logos hi Greek ho hman danah chuan thupuang chhuaktu rilrua thil awm, remruatna emaw hrilhfiahna emaw- lemchan ziaktu rilrua thil awm tihlanna hi a ni a, tin, taksa chetziaa ngaihtuahna lanchhuahtir emaw a sawi a sawi pawh nise, lemchanna hmun dawhsana tihchhuah hi logos chu a ni bawk. Johana bung khatna thu hian logos chu a tirah Pathian rilruah a awm tih thu a sawi a ni. Hunbi tiam alo kim veleh Pathianin a remruatna chu thiltihin a lanchhuahtir ta a ni. A remruatna chu tisain a thuam ta a, Isua Krista, mihring pianhmang pu alo ni ta a ni.

                John Miller chuan Logos chu “Amah Pathian inpuangchhuak” a ni a ti a ni [10]. Amplified Bible chuan Johana 1:1 thu hmawr bawkna chu “Thu chu amah Pathian ngei chu a ni” tiin a letling a ni. Flanders leh Cresson-te chuan, “Thu chu Pathian, Amah leh Amah a inhnaihawnna hmanrua a ni” an ti a [11]. Chang 14-na thu chuan he Pathian ngaihtuahna thu- Thu tisaa lo lang hi Pa Fapa mal neihchhun ropuina nei a ti a, chan 18-na thu chuan “Fapa chuan Pa chu a pholang ta a ni” a ti a ni.

                Greek mite finna zirna (Philosophy) ah chuan, Logos chuan lei leh van innghahna bulpui- finna leh hriatthiamna tih a kawk a ni. Johana hunlai hian Greek mifing thenkhatte leh Juda Pathian thu zirthiam hote chu Greek ho ngaihdan hian a hneh hle a, a bik takin Juda mifing Alexandria khaw mi Philo chuan Logos chu Pathian hnuaihnung deuh leh chhangdawltu, Pathian tak atanga lo luang chhuak niin a ngai a ni [12]. Kristian kalsual thenkhatte’n (Gnosticism zirtirna lo piangchhuak thar huapin) he ngaihdan hi an zirtirnaah an la lut a, Isua chu dinhmun hnuaihnungah an dintir zui ta a. Heng zirtirnate hi a dikloh zia lantir pahin an thu hman thin hmansak vein Johana hian thudik tak  zirtirnan a hmansak ve thung a ni. Thu (Logos) chu Pathian aia hnuaihnung zawk a ni lova, Pathian a ni zawk a ni (Johana 1:1). Thu chu Pathian hnen atanga lo chhuak a ni lova, Pathianah chuan atir atangin a awm reng zawk a ni (Johana 1:1-2). Isua Krista, Pathian Fapa chu, Thu ngei chu a ni a, tisaa lo lang Pathian ngei chu a ni. Chang khatna thua mi “Hnenah” tih hi Greek tawng “Pros” a ni a. Hebrai 2:17 thu leh 5:1 thu leh, Johana 1:1 thua mi “hnenah a bet tlat a” tih nen thuhmun chiah a ni a, chutichuan “Thu chu Pathian hnenah a bet tlat a, Thu chu Pathian chu a ni” tiin a lehlin theih bawk a ni.

                                                                                                                       - Source THE ONENESS OF GOD by David K. Bernard

BAPTISMA

  Bible-ah hian Baptisma pawimawhna hi kan hmu nasa em em a. Chutih rual chuan Baptisma engahmah ngailo kohhrante pawh kan lo awm ve zel a. Bible-ah a chuang em? Kan tan ala hman chi em? Ala tangkai pha em? Tihte hi kan hriat vek angai a ni.

      Baptisma hi a pawimawh em em a ni. Kohhran tam zawkte chuan Baptisma hi kan ngai pawimawh hle a. Chutih laiin Baptisma tul ti ve tho si, mahse ngai pawimawh em em lo, kohhran an tam hle. Baptisma pawimawhzia an sawi dan hrang hrang hi tlem azawng I han tarlang hmasa phawt teh ang:

  ✍ ‘Baptisma chu tuia hnim tihna a ni. Mi tharte Baptisma chantir hi nunhlui bansanna, sual sim an duh entirnan leh Pathian thu awiha nun thara nung tura an inpeihna entirna a ni’. (Rom 6:1-4)’ (Mizo Study Bible 1410 published by the Bible Society of India)

✍ Thuthlung Tharah chuan piantharna chhinchhiahna tur leh nemnghehna tura Pathianin a hman thin chu Baptisma a ni. (John 3:5; TT 2:38;3;5) (Bible Dictionary page 415 published by Synod Publication Board)

✍ Rom 6:3,4…….. Baptisma ngei hi Golgotha-a baptisma channa diktak kan chan hmasak tur chu a ni. He lai chang hian a ti fiah tawh hle awm e. Baptisma chu Messiah thihna leh thawhlehna a ni a (Luka 12:50),… Tuia hnim phuma awm chuan sual lam kawnga thihna leh sual kawng tlansana entir ang bawkin  tui ata lo chhuah lehna chuan sual kawng ata fihlima-Krista nun lehna a entir a ni. (Jerusalem leh Rom Indona page 72-78, Published by the Church of God (Israel, Mizoram: India. 2000)

            He a chunga mi hrang hrangten an ngaihdan leh rindan an sawi atang pawh hian Baptisma chu a ziarang kan hre tawhin a rinawm.

            Baptisma hi engtia lo chhuak nge? Thuthlugn Hlui rawngbawlna hlimthla a ni tih hriat tur. A chhan chu hmanlai ziak apiang mai chu kan tan entirna tur a ni (Rom 15:4). Tichuan  hmun thianghliama luh dawn reng rengin Puithiam tu pawh , Lalber pawh tiamin, dar maihunah an insilfai hmasa ziah tur a ni. Tui pawimawhzia heng changah hian kan hmu (Sam 23:2; Isaia 55;1, 10; Jer 2:13). Chumiin a entir chu Kohhran hmun thianghlima lut tur chuan kan insil fai, bawlhhlawh loh a ngai tihna a ni.

Lal Isuan chhandamna/vanram luhna sawi hrang hrangte:

☞ Lal Isua khawvela a len lai khan, Piantharna chungchangah Juda zirtirtu (Rabbi) pakhatin a rawn kawm tlat mai a. A hming chu Nikodema a ni. An inkawmnaah chuan piantharna chungchang an sawi ta a. An han inkawm tan dawn chauhva, Lal Isuan , “Tih tak meuhvin, tih tak meuhvin ka hrilh a che , mi tupawh an pianthar loh chuan Pathian ram an hmu thei lovang,” (John 3:3) ati nghal tawp mai a ni. Mahse Nikodema’n a hrethiam lo. “Mi a tar hunin engtin nge a pian theih ang? A nu pumah vawi hnih lutin a piang thei em ni?” (John 3:4) tiin a zawt tlawng mai. A bo ve hle a ni. Tunlai ringtu tamtak ang hi a ni ve ngei ang. Isuan a chhang leh a, “Tihtak meuhvin, tihtak meuhvin ka hrilh a che mi tupawh tuiah leh thlarauah an piang loh chuan Pathian ramah an lut thei lovang” (John 3:5)-ah a ti ta a ni.  

Helai thu hi Isuan piantharna leh Pathian ram luhtheihna thu a sawina hmasaber pawl a ni hial awm e. Vanrama lut, Pathian rama lut tur chuan pianthar a ngai a ni tih chiang takin kan hmu a ni. Mahni duh thu thua lo piangthar ve ngawt theh pawh a ni lo. Tui leh Thlarauvah pianthar angai a ni. Chuti a nih loh chuan piantharna a tling lo. Piangthar lo chu vanram an lut dawn lova. Tichuan Pathianin vanram kan luh ve theihnan tui (baptisma) leh Thlarau (baptisma) chan a tulziua a rawn sawi a. Chumi chan loh chuan vanramah luh theih a ni dawn lo a ni tih a sawi leh ta a ni.

             ☞ Mt. 5:20 thuah, “Infelnain lehkhaziaktute leh Pharisaite felna hi a khum loh chuan vanram in lut tawp lovang tih ka hrilh che u a nih hi,” a ti leh a. Pharisai  fel em em maite, kar khata vawi hnih vawi thum chuang chaw nghei zat zatte, Pathian ngaihsak em em te, thawhhlawk em em thin te, tawngtai peih em em thinte kan khum zawh loh chuan vanram kan kai hauh dawn lo a ni tih a sawi a. A awmzia chu mihring felna ringawt leh inpekna ringawt hian vanram a kai theih loh tihna a ni.

            Mi hausa dollar vaibelchhe tela tanpuina sem thinte hi an va fel em, thil tha an va ti nasa em, an felnate hi engtikahmah keini hote hi chuan kan tluk hauh lovang le. Mahse an felna kan tluk loh a, kan khum loh chuan Lal Isuan ‘vanram in kai lovang’ ati si. Engtin nge kan tih tak ang le?

            Mihausate tluk a, Pharisaite kan khum a, an aia kan tih that ve theihna awm chhun chu Baptisma bawk hi a ni a. Baptisma kan chan hian felna zawng zawng kan hlen chhuak vek tihna a ni. Mihausa sawma pakhat thawh theuh theuh, inkhawm peih em em, inpe em em, mi fel lutuk baptisma chang chuang si lote chu vanram an kai lul lovang. “Nimahse Isuan ‘tunah remti hram rawh, heti anga felna zawng zawng hlen chhuah hi kan tan a mawi a ni,” tiin a chhang a (Mt 3:15. Chutichuan Pharisai felna kan khum theihnan, felna zawng zawng hlen chhuahna Baptisma kan chan a ngai a ni.

            ☞ Isua van a lawn dawnah, vanram luh leh luh lohna thu khawvel mi zawng zawng huap zo a puang leh ta. Thuthlung hmasa-serhtan, dan thu zawng zawngte kha mi zawng zawng a huap zo lo a, chuvang chuan demawm alo ni ta. Chu miah chuan thuthlung thar tha lehzual chatuan ram hawlh phak chu Lal Isuan a puang leh ta. A zirtirte hnenah chuan thurochhiah a nei ta a. (Hebrai 9:16). Chu, van a lawn dawn a a thurochhiah chu eng nge ni ta ang le? Tin, an hnenah, “Khawvel zawng zawngah kal ula thil siam zawng zawng hnenah chuan chanchin tha hi hril rawh u. A ringa baptisma chang chu chhandamin an awm ang a, a ring lo erawh chu thiamloh changin an awm ang,” (Mk 16:15-16) ah alo ti a. Ring chunga baptisma chang chu chhandam tur, a ring lo chu chhandam lo a ni tawp mai a ni. Isua thupek/ thurochhiah a ni a, tu tihdanglam chi mah a ni lo. Kohhran/pawlin a lo tihdanglam ve ngawt chi a ni reng reng lo a ni.

            Tichuan Pathianin Israel fate sualna zawng zawngte, an bawlhhlawh zawng zawngte chu an tana hautak lo te leh an zawh tawk tawk turin sual ngaihdamna hmanrua siamsak a tum tlat a ni. Zakaria 13:1-ah chuan “Chumi niah sual leh bawlhhlawhna tlenfai nan Davida chhungte leh Jerusalem luahtute hnenah chuan tuikhur hawnin a awm ang,” a lo ti a. Chu chu engtikah nge alo thlen dik tihte kan chhui dawn a ni.

            Lal Isuan a zirtirte hnenah Kohhran din a tum thu leh ‘tu sual pawh an ngaihdam chu vanah pawh ngaihdam, an ngaihdam loh chu vanah pawh ngaihdam loh’ anih tur thu a sawi (Mt 16:18-20). Tichuan a thih hnua vana a lawn dawnah ngaihdamna chanchin tha chu a puang ta. Mahse Zakaria 13:1; TT 1:8; Lk 24:47 thu angte khan sual ngaihdamna chu Jerusalem atanga lo chhuak tur a ni tlat. Tichuan Jerusalem atang chauha lo chhuak tur chu a kengkawh tur leh thuneihna a pek tawh a zirtirte chuan Pentecost niah chuan an kengkawh ta. Petera sermon naah chuan mi tam takte an inhmuchhuak ta a. An thinlung chhun ang hialin alo na a ta a ni. An inhmuchhuak chiang hlawm hle a ni tih kan hre thei a; ‘Pute u eng nge kan tih tur’ tiin an zawt nghal a ni. Mahse Petera chuan ‘Kros-ah a chhandam tawh che ring mai rawh’ a ti reng reng lo. Engtin nge a tih? Isuan chhandamna thu a sawi aia dang deuh a kawhhmuhin a sawi hauh lo. Tin, Petera chuan an hnenah, “Sim ula in sual ngaihdam nan Isua Krista hmingin baptisma chang theuh rawh u, tichuan Thlarau Thianghlim pek hi in hmu ang. A tiam kha nangni tan pawh, in fate tan pawh, hla taka mi zawng zawng tan pawh, Lalpa kan Pathianin a koh apiangte tan a ni e,” alo ti ta a ni.

            Khawvel mi zawng zawng tan chhandamna baptisma chu angai a ni tih chiang takin kan hmu a ni. Keini kohhran tan, chhungkaw tan a ni ve lo tih rikngawt chi a ni reng reng lo. Mi zawng zawng zingah hian nang leh kei hi kan tel a ni.

            Heta chiang tae m em mai chu Isua hminga baptisma an chang hi a ni. Tichuan chu chhandamna thupek baptisma chu nang leh kei pawh hian kan tih ve tur a ni ngei ang. ‘Hengho tan chauh hian ngensak ka ni lo, an thu avanga kei mi la ring turte tan pawh ngensak ka ni bawk e,’ John 17:20-ah chuan Isuan a sawi. Isua tawngtaina hian nag leh kei hi min huap tel ve em? A zirtirte thu lo sawi pawma an tih anga ti a, an ringa ringte tan Lal Isua kha a tawngtai a ni. In kohhran/pawl khan Lal Isua zirtirte tih dan angin in zirtir em? An ring angin in ring em? A chhanna chu nagman I hria e.

                BAPTISMA AWMZIA:

Baptisma tih chu Greek tawng atanga lak a ni a. Greek ṭawng thumal Baptizo tih chu Mizo ṭawng chuan ‘hnim’, ‘chiahpil’ tihna a ni (Rom 6:4) Chuvangin baptisma kan chan dawn chuan kan inhnim phum ngei tur a ni. Chubakah Lal Isuan ‘Tui leh Thlarauvah’ a tih avangin Baptisma chu tuiah ngei chan tur a ni tih min zirtir a ni.  Mi thenkhatten, tuia in baptis kher hi baptisma a ni vek kher lo an ti thin. Puanzara luh tlangte pawh baptisma a ngai kan awm a. Chu chu Isuan sawi a tum a ni reng reng lo a ni. Baptisma chu tuiah chan tur a ni a. Tichuan Thlarau Thianghlim baptisma a awm leh a, chu bak baptisma dang Lalpan pawm a nei lo a ni.

            Tunlai Kristian ringtu inti tamtakte hian Baptisma (hnim phum) hi a nih tur angin an hmang lo fo thin. Lal Isuan ‘inhnim phum rawh u’ a tih mawlh mawlh lain, thenkhat chuan Rantizo (thlawr)in an in thlawr thin a. Rantizo hi Baptisma a ni lo hrim hrim a ni. Mihring phuahchawp a ni a. Isua hunlai pawhin leh Thuthlung Thar hunah reng reng khan baptisma chan nan an inthlawr tih hmuh tur a awm reng reng lo a ni.

           

Engtin nge Baptisma hi an sawi/hrilhfiah reng ilo en teh ang

           

1. Greek English Lexicon by Liddel Scott and Thayer “Baptisma tih hi Greek tawng ‘Baptizo’ atanga lehlin a ni a. Mizo  tawng chuan hnim phum emaw hnim pil emaw tihna a ni.

           

            2. Pulpit Commentary volume 18, phek 156, Rom 6:4 angin Baptisma tih chu hnim phum a ni tiin a ziak bawk.

         3. Greek English Dictionary by Pollet : Greek tawng thumal pakhat Baptizo tih chu tuia hnim phum tihna a ni.

           

            (Rantizo chu thlawr tihna a ni a, Baptisma nen a kawh tum, a awmzia leh a nihphung a hrang hlak a ni. Thil thuhmun a ni reng reng lo)

           

            Engtia chan tur nge?

Baptisma chu hnim phum (immersed) tihna a ni a. Mahni duh dan leh awlsam dan dana lo tih danglam ve tawp mai chu Bible-in a phal reng reng lo a. Baptisma an chan reng reng hian tuiah hnim phum zelin an chang a ni tih Bible ah kan hmu a ni (John 3:13,16. TT 8:36,39;10:47). An inthlawr (rantizo) ngai lo a ni. Bible-ah tih dan dang kan hmu reng reng lova, hetiang anih avang hian Bible thu zawm ila, baptisma chu hnim phum ngeiin kan chang tur a ni. Inthlawr(rantizo) tih vel hi chu Bible piah lam thil a ni tih kan hriat reng a tha.

           

Tu hminga chan tur nge?

“Chutichuan kal ula, hnam tina mi zirtirah siam ula, Pa leh Fapa leh Thlarau Thianghlim hmingah chuan baptis ula, thu ka pek zawng zawng che u pawm turin zirtir rawh u,” (Mt. 28:19) thu hi kohhran tamtakte chuan tanchhanah hmangin Trinity inzirtirna leh baptisma chan nan an hmang fo thin.

            He thu hi a zirtirte hnena a sawi a ni a. Pa leh Fapa leh Thlarau Thianghlim hi hming a ni lova, Pathian nihna (title) a ni zawk tih hi kan hriattur pawimawh tak a ni. A zirtirte chuan Pa leh Fapa leh Thlarau Thianghlim hming chu an hrechiang hle, Lal Isuan chumi hmingah chuan baptis rawh u a ti a. A zirtirte khan engtin nge an baptis le? Lal Isua thupek an hman chhuahna hmasa ber chu Pentecost ni-ah Petera’n a puang chhuak ta. “Sim ula in sual ngaihdamnan Isua Krista hmingin baptisma chang theuh rawh u. Tichuan Thlarau Thianghli pek hi in hmu ang. A tiam kha nang ni tan pawh, infate tan pawh, hla taka mi zawng zawng tan pawh, Lalpa kan Pathianin a hnena a koh apiangte tan a ni e,” (TT 2:38-39) ah chuan alo ti ta a ni.

            Pa leh Fapa leh Thlarau Thianghlim hming chu Isua Krista a ni tih hi kan hriatreng tur a ni. Pa leh Fapa leh Thlarau Thianghlim hmingin ka baptis a che tia tawngkam an hmanna Bible-ah hian hmuh tur a awm lova, Pa leh Fapa leh Thlarau Thianghlim hming neitu Lal Isua Krista hmingin an in-baptis thin zawk a ni tih Bible-ah kan hmu a ni. Isua hming ngeia baptisma chan hi tihdan dik, pawm tlak leh rintlak, zirtirte tih dan Bible zirtirna ngei a ni tih I hre thar leh ang u.

            Bible a Isua hminga Baptisma changtute:

                        ✔       Samari mite,   (T.T 8:16)

                        ✔  Jentailte           (TT 10:47,48)

                        ✔       Ephesi khuaa mite      (TT 19:5)

                        ✔       Tang vengtu leh a chhungte (TT 16:31-33)

                        ✔       Mi sangthumin            (TT 2:38-41)

                        ✔       Galatia mite     (Galatia 3:27)

                        ✔       Korinth khua mite        (TT 18:8)

                        ✔       Philipi mite       (TT 16:14-33)

                        ✔       Kollossa kohhran        (Kol 2:12)

                        ✔       Rom Kohhrante          (Rom 6:1-4)

            Isua hminga baptisma chan loh hi Bible piah lam zirtirna a ni tih a lang chiang ta em em a ni.

            Historian-ten engtin nge an sawi:

            ✍  Hastin, Encyclopedia of Religion, phek 377 kan chhiar chuan, Justin Martyr-a hun thleng lhan Isua hming chauin an inhnim phum thin a ni.

            ✍ Canney Encyclopedia of Religion, phek 53-na kan chhiar chuan kum zabi 2-na AD 200 thleng kha chuan Isua hming chauhin baptisma an chang thin a ni.

            ✍ Catholic Encyclopedia Volume 2, page 435-naah chuan Isua hminga hnim phuma baptisma chan hi- Pa leh Fapa leh Thlarau Thianghlim hming lama thawrin anmahni Catholic thlak (thupek) ngei a ni tih a inziak. Presbyterian, Baptist leh pawl dang dangte hian Catholic atanga protestant alo pian khan Catholic ho thlak danglam hi pawm vein an hmang zui ve ta zel a ni.

            Baptisma pawimawhna:

            Baptisma pawimawhzia hi Bible ah hmuh tur a awm nual a, chung a pawimawhnate chu a hnuaiah hian ka’n tarlang ang e.

            ☞      Lal Isua thupek a ni. --- (Mt 28:19)

            ☞      Chhandamna a ni. ----- (Mk 16:16; I Petera 3:20)

            ☞      Pathian thinur tlansanna a ni. ---- (Luka 3:6-7)

            ☞      Sual ngaihdamna a ni. (TT 2:38)

            ☞      Sual tlenfaina a ni. --- (TT 9:18; 22:16)

            ☞      Pathian ram luhna a ni. --- (John 3:5)

            ☞      Krista inthuamna a ni. – (Gal 3:27)

            ☞      Krista serhtanna a ni. --- (Kol 2:11-12)

            ☞      Felna hlenchhuahna a ni. (Mt 3:15)

            Heta tang mai pawh hian baptisma pawimawhzia chu kan hre thei mai awm e. Chhandamn kan duh a, kan sualte ngaihdama a awm kan duh bawk chuan Isua hminga Baptisma (hnim phum) kan chan a ngai a ni. Baptisma hi pawl thil mai a ni lo. Isua thupek, Isuan chhandamna tur atana hmanrua min pek a ni. Chumi pawm lotute chu chhandam an ni dawn lo a ni.

            Rin dan dang: Kohhran pawl thenkhat chuan a hranpaa tuia in baptis a ngai kher lo. Pathian thu kan hriat a kan awih hian a thu khan min baptis tawh zawk a ni an ti. Baptisma hi tuia hnim phum kher tihna a ni lo an ti fo thin. Mahse, Bible thu ngun leh chik zawka kan en chuan Isua thu hriaa zawmtuten tuiah ngei baptisma (hnim phum) an chang thin.

            “Heta hi tui a awm, baptisma chan nan engin nge min dal?” (T.T 8:35-38)-ah chuan a ti mai a ni. A thu mai chuan a baptis ngai lo a ni. Chuvang chuan chhandam inih theih nan Lal Isua thupek angin I sualte sim la, Lalpa Isua Krista hmingin Baptisma (hnim phum) chang la, Thlarau Thianghlim baptisma pawh chang turin tan la ang che.

                                                                                                 -       Exerpt from Indona Oneness & Trinity by L.H Kapchhunga